ବେଙ୍ଗାଲୁରୁ: କର୍ଣ୍ଣାଟକର କଂଗ୍ରେସ-ଜେଡିଏସ ମେଣ୍ଟ ସରକାରରୁ ଇସ୍ତଫା ଦେଇଥିବା ବିଦ୍ରୋହୀ ବିଧାୟକମାନଙ୍କୁ ବାଚସ୍ପତି କେ.ଆର. ରମେଶ କୁମାର ସମନ୍ ଜାରି କରିଛନ୍ତି। ଆସନ୍ତା ମଙ୍ଗଳବାର ଅପରାହ୍ନ ୩ଟା ସୁଦ୍ଧା ବିଦ୍ରୋହୀ ବିଧାୟକମାନେ ତାଙ୍କ କାର୍ଯ୍ୟାଳୟରେ ହାଜର ହେବା ଲାଗି ବାଚସ୍ପତି ନୋଟିସରେ ଦର୍ଶାଇଛନ୍ତି। ମେଣ୍ଟ ସରକାରରୁ ଇସ୍ତଫା ଦେବା ପରେ କଂଗ୍ରେସର ୮ ଏବଂ ଜେଡିଏସର ୩ ବିଦ୍ରୋହୀ ବିଧାୟକଙ୍କୁ ଅଯୋଗ୍ୟ ଘୋଷଣା କରିବା ଲାଗି ମୁଖ୍ୟମନ୍ତ୍ରୀ ଏଚ.ଡି. କୁମାରସ୍ବାମୀ ବାଚସ୍ପତିଙ୍କ ନିକଟରେ ଆବେଦନ କରିଥିଲେ। ଏହାର ଶୁଣାଣି କରିବା ଲାଗି ବାଚସ୍ପତି ବିଦ୍ରୋହୀ ବିଧାୟକମାନଙ୍କୁ ସମନ ଜାରି କରିଛନ୍ତି।
ସୂଚନାଯୋଗ୍ୟ, ବିଦ୍ରୋହୀ ବିଧାୟକମାନେ ମେଣ୍ଟ ସରକାରରୁ ଇସ୍ତଫା ଦେବା ପରେ କର୍ଣ୍ଣାଟକରେ ରାଜନୈତିକ ସଙ୍କଟ ଦେଖାଦେଇଛି। ମେଣ୍ଟ ସରକାର ସଂଖ୍ୟା ଗରିଷ୍ଠତା ହରାଇଥିବା ଦାବି କରି ବିରୋଧୀ ବିଜେପି ତୁରନ୍ତ ମୁଖ୍ୟମନ୍ତ୍ରୀ ବିଧାନସଭାରେ ବହୁମତ ସାବ୍ୟସ୍ତ କରିବାକୁ ଆହ୍ବାନ କରିଛି। କିନ୍ତୁ ରାଜ୍ୟରେ ଚାଲିଥିବା ଏହି ହାଇ ଭୋଲଟେଜ ଡ୍ରାମା ଦିନକୁ ଦିନ ନୂଆ ମୋଡ଼ ନେଉଥିବାରୁ ବର୍ତ୍ତମାନ ସୁଦ୍ଧା ଆସ୍ଥା ଭୋଟ ହୋଇପାରିନାହିଁ।
