ଜାମ୍ମୁ : ପାକିସ୍ତାନ ଅଧିକୃତ କାଶ୍ମୀର (ପିଓକେ) ଓ ଗିଲଗିଟ୍ ବଲଟିସ୍ତାନ ହେଉଛି ପାକିସ୍ତାନର ଜବରଦଖଲ ଅଞ୍ଚଳ। ଏହା ପାକିସ୍ତାନର ସାର୍ବଭୌମତ୍ବର ଅଂଶ ନୁହେଁ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି। କାର୍ଗିଲ ବିଜୟ ଦିବସ ଉପଲକ୍ଷେ ଜାମ୍ମୁରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇ ରାଜନାଥ କହିଛନ୍ତି ଯେ ପିଓକେ ସମେତ ସମଗ୍ର ଜାମ୍ମୁ-କାଶ୍ମୀର ଭାରତର ଅବିଚ୍ଛେଦ୍ୟ ଅଂଶ। ଜାମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦ ପରେ ଏଠାରେ ରହିଥିବା କୃତ୍ରିମ ପ୍ରତିବନ୍ଧକ ଦୂର ହୋଇଛି। ଏହା ସହିତ ଏଠାରେ ବିକାଶର ନୂଆ ଧାରା ଆରମ୍ଭ ହୋଇଛି। ସେ କହିଛନ୍ତି ଯେ ୧୯୬୫ ଓ ୧୯୭୧ରେ ପାକିସ୍ତାନ ପ୍ରତ୍ୟକ୍ଷ ଯୁଦ୍ଧ କରି ଭାରତ ଠାରୁ ପରାଜୟ ବରଣ କରିଥିଲା। ପରବର୍ତ୍ତୀ ସମୟରେ ଭାରତ ବିରୋଧରେ ଛାୟା ଯୁଦ୍ଧ କରି ମଧ୍ୟ ପାକିସ୍ତାନ ପରାଜୟ ବରଣ କରିଛି। ଭାରତର ସାହସୀ ଓ ବୀର ଯବାନଙ୍କ ଯୋଗୁଁ ଭାରତର ଅଖଣ୍ଡତା ବଜାୟ ରହିଛି। ୧୯୯୯ରେ ଭାରତ ବିରୋଧରେ ପାକିସ୍ତାନ ଛାୟା ଯୁଦ୍ଧ ପୂର୍ବକ ଲଦାଖର କାର୍ଗିଲ ପାର୍ବତ୍ୟ ଉପତ୍ୟକାକୁ ବେଆଇନ ଭାବେ ଦଖଲ କରିଥିଲା। ମାତ୍ର ଭାରତ ସେନା ଅଦମ୍ୟ ସାହସ ଓ ପରାକ୍ରମର ସହିତ ପାକିସ୍ତାନ ସେନାକୁ ବିତାଡିତ କରିବାରେ ସଫଳ ହୋଇଥିଲା। ଭାରତ ସେନାର ଏହି ସଫଳତା ପାଇଁ ପ୍ରତିବର୍ଷ ଜୁଲାଇ ୨୬ରେ କାର୍ଗିଲ ବିଜୟ ଦିବସ ପାଳିତ ହେଉଛି।
Popular Categories
Previous article
Next article