କନ୍ଧମାଳ: ପୁଣି ବଢିଲା କରୋନା ସଂକ୍ରମଣ, ୧୯ ନୂଆ ସଂକ୍ରମିତ ଚିହ୍ନଟ

ଫୁଲବାଣୀ: ଦୀର୍ଘ ୧୦ ଦିନର ବ୍ୟବଧାନ ପରେ କନ୍ଧମାଳ ଜିଲାରେ ପୁଣିଥରେ କରୋନା ସଂକ୍ରମିତ ସଂଖ୍ୟା ଉପରକୁ ଉଠିଛିି। ଗତ ୪ ତାରିଖରେ ଜିଲ୍ଲାରେ ସଂକ୍ରମିତଙ୍କ ସଂଖ୍ୟା ୧୯ ରହିଥିଲା। ତା’ ପରଠାରୁ ଦୈନିକ ସଂକ୍ରମଣ ସଂଖ୍ୟା, ସର୍ବ ନିମ୍ନ ୮ରୁ ସର୍ବାଧିକ ୧୨ ମଧ୍ୟରେ ରହିଆସିଥିବା ବେଳେ ଜିଲ୍ଲାରେ ଆଜି ନୂତନ ଭାବେ ୧୯ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏଥିସହିତ ବାଲିଗୁଡା ଅଞ୍ଚଳର ଜଣେ ୪୬ ବର୍ଷିୟ ପୁରୁଷଙ୍କର କୋଭିଡରେ ଆକ୍ରାନ୍ତ ହୋଇ ମୃତ୍ୟୁ ହୋଇଥିବାର ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଆଜିର ସଂକ୍ରମିତଙ୍କୁ ମିଶାଇ ଜିଲ୍ଲାରେ ମୋଟ କରୋନା ଆକ୍ରାନ୍ତଙ୍କ ସଂଖ୍ୟା ୫,୮୧୮ରେ ପହଞ୍ଚିଥିବା ବେଳେ ୫,୬ ୯୩ ଜଣ ସଂକ୍ରମିତ ସୁସ୍ଥ ହୋଇ ଘରକୁ ଫେରିଛନ୍ତି।

ଆଜି କୋଭିଡରେ ଆକ୍ରାନ୍ତ ହୋଇ ବାଲିଗୁଡ଼ା ଅଞ୍ଚଳରେ ଜଣଙ୍କର ମୃତ୍ୟୁ ଘଟିଥିବା ବେଳେ ବର୍ତ୍ତମାନ ଜିଲାରେ କରୋନା ଜନିତ ମୃତ୍ୟୁ ସଂଖ୍ୟା ୩୨ରେ ପହଞ୍ଚିଛି। ଆଉ ୯୩ ଜଣ ସଂକ୍ରମିତ ବିଭିନ୍ନ କୋଭିଡ ହସପିଟାଲରେ ରହି ଚିକିତ୍ସିତ ହେଉଥିବା ନେଇ ଜିଲ୍ଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି। ଆଜିର ସଂକ୍ରମିତ ମାନଙ୍କ ମଧ୍ୟରୁ ଫୁଲବାଣୀ ପୌରାଞ୍ଚଳରେ ଜଣେ ଏବଂ ଗ୍ରାମାଞ୍ଚଳରେ ଜଣେ ସଂକ୍ରମିତ ଚିହ୍ନଟ ହୋଇଥିବାବେଳେ ବାଲିଗୁଡାରେ ୩ ଜଣ, ଦାରିଙ୍ଗବାଡିରେ ୪, ଖଜୁରିପଡାରେ ୩, ଚକାପାଦରେ ୩, ଫିରିଙ୍ଗିଅ.ଘୁ, ଉଦୟଗିରି, ରାଇକିଆ ଏବଂ ଟିକାବାଲି ଅଞ୍ଚଳରେ ଜଣେ ଲେଖାଏଁ ଚିହ୍ନଟ ହୋଇଥିବା ନେଇ ଜିଲ୍ଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।

Comments are closed.