କଲମପୁର: ଗତ ଚାରି ଦିନ ଧରି ଲାଗି ରହିଛି ଗ୍ରୀଷ୍ମ ତାପର ପ୍ରକୋପ। ଦିନକୁ ଦିନ ଗ୍ରୀଷ୍ମ ତାପ ବୃଦ୍ଧି ପାଉଥିବାରୁ ଜନ ସାଧାରଣ ନାହିଁ ନଥିବା ଅସୁବିଧା ଭୋଗୁଛନ୍ତି। ଶନିବାର ଦିନ ୧୨ଟା ସୁଦ୍ଧା କଲମପୁର ଅଂଚଳରେ ତାପମାତ୍ରା ୪୪ ଡିଗ୍ରୀରେ ପହଂଚି ସାରିଛି। ଦିନକୁ ଦିନ ପାରଦ ବୃଦ୍ଧି ପାଉଥିବାରୁ ଲୋକଙ୍କ ମଧ୍ୟରେ ଅଂଶୁଘାତ ହେବା ନେଇ ଆଶଙ୍କା ଦେଖା ଦେଇଛି। ସକାଳ ୧୦ଟାରୁ ଲୋକେ ବାହାରକୁ ବାହାରିବା ପାଇଁ ନିଜକୁ ଅସୁରକ୍ଷିତ ମନେ କରୁଛନ୍ତି। ଦୋକାନ ବଜାର ଖାଁ ଖାଁ ଲାଗୁଥିବା ବେଳେ ରାସ୍ତା ଘାଟ ନିଛାଟିଆ ହେଇଯାଉଛି। ଗ୍ରାଷ୍ମ ତାପ କଲବଲ କରୁଥିବାରୁ ରାଜ୍ୟ ରିଲିଫ କମିଶନ ଆଗାମୀ ୪୮ ଘଣ୍ଟା ପାଇଁ ଲୋକଙ୍କୁ ସୁରକ୍ଷିତ ଭାବେ ରହିବା ନେଇ ସତର୍କତା ଜାରି କରିଛନ୍ତି। ଏହି ସମୟ ମଧ୍ୟରେ ଜନ ଜୀବନ ପ୍ରତି ବିପଦ ରହିଥିବାରୁ ଅତି ଆବଶ୍ୟକତା ନଥିଲେ ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଘରରୁ ବାହାରକୁ ନବାହାରିବା ପାଇଁ ସତର୍କ କରାଯାଇଛି।
ଏହାସହ ଏହି ସମୟ ମଧ୍ୟରେ ପର୍ଯ୍ୟାପ୍ତ ପରିମାଣରେ ପାଣି, ତୋରାଣୀ, ଘୋଳ ଦହି, ଲେମ୍ଭୁ ସରବତ ଏବଂ ପଇଡପାଣି ସମେତ ଅନ୍ୟ ପାନୀୟ ବ୍ୟବହାର ପାଇଁ ପରାମର୍ଶ ଦିଆଯାଇଛି। ଏପରିକି ଏହି ସମୟ ମଧ୍ୟରେ ମାଦକ ଦ୍ରବ୍ୟରୁ ଦୂରେଇ ରହିବା ପାଇଁ ଲୋକଙ୍କୁ ସଚେତନ କରାଯାଇଛି। ବିଡିଓ ବିଜୟ କୁମାର ମାଣ୍ଡାଙ୍ଗିଙ୍କ ନିର୍ଦ୍ଦେଶକ୍ରମେ ଡାକବାଜି ଯନ୍ତ୍ର ଏବଂ ପ୍ରଚାର ପତ୍ର ମାଧ୍ୟମରେ କଲମପୁର ଅଂଚଳରେ ଲୋକଙ୍କୁ ସଚେତନ କରାଯାଇଛି। ଗ୍ରୀଷ୍ମ ତାପ ପ୍ରକୋପ ଏବଂ ଅସହ୍ୟ ଗୁଲୁଗୁଳି ଜାରି ରହିଥିବା ବେଳେ ବାରମ୍ବାର ବିଦ୍ୟୁତ୍ ବିଭ୍ରାଟ ଜନ ଜୀବନକୁ କଲବଲ କରୁଛି।
