କଲମପୁର: ମଙ୍ଗଳବାର ଜୟପାଟଣା ମୋଟେର ମୁଖ୍ୟ ରାସ୍ତାର ବଡକୁଟୃ ଛକ ନିକଟରୁ ଏକ ବାଇକ୍ ଯୋଗେ ଗଞ୍ଜେଇ ଚାଲାଣ କରୁଥିବା ଜନୈକ ଯୁବକକୁ ଅବକାରୀ ବିଭାଗ କର୍ମଚାରୀ ଗିରଫ କରିଛନ୍ତି।
ଧର୍ମଗଡ଼ ଅବକାରୀ ଇନ୍ସପେକ୍ଟର ହେମକାନ୍ତ ସୁନାଙ୍କ ନେତୃତ୍ବରେ ଧର୍ମଗଡ ଓଆଇସି ପ୍ରତୀମା ବେହେରା, ଜୁନାଗଡ଼ ଓଆଇସି ଲକ୍ଷ୍ମୀ ପ୍ରିୟା ମଲ୍ଲିକ, ଜୟପାଟଣା ଓଆଇସି ନରେନ୍ଦ୍ର ମିଞ୍ଜ ପ୍ରମୁଖଙ୍କ ସମେତ ବିଭାଗୀୟ କର୍ମଚାରୀ ବଡକୁଟୃ ଛକ ନିକଟରେ ଯାଞ୍ଚ କରୁଥିଲେ।
ଏହି ସମୟରେ କଲମପୁର ଥାନା ଅଧିନସ୍ଥ ଡୁମେରମୁଣ୍ଡା ଗ୍ରାମର ଶଙ୍କର ନାଏକ ନାମକ ଜନୈକ ଯୁବକ ଏକ ବାଇକ୍ ଯୋଗେ ଆସୁଥିବା ବେଳେ ଅବକାରୀ ବିଭାଗ କର୍ମଚାରୀ ତାକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ସମୟରେ ବାଇକରୁ ୨୫ କିଲୋ ୫୦୦ ଗ୍ରାମ ଗଞ୍ଜେଇ ମିଳିଥିଲା। ଅବକାରୀ ବିଭାଗ ଅଧିକାରୀ ଗଞ୍ଜେଇ ସହ ବାଇକକୁ ଜବତ କରିଥିଲେ। ଧର୍ମଗଡ଼ ଅବକାରୀ ଥାନା କେସ ନଂ ୧୫/୨୦୨୫/୨୫ରେ ମାମଲା ରୁଜୁ ପରେ ଶଙ୍କରକୁ ଗିରଫ କରି କୋର୍ଟ ଚାଲାଣ କରିଥିଲେ।
