କଲମପୁର: ଗୁରୁବାର କଲମପୁର ଗୋଷ୍ଟୀ ସ୍ୱାସ୍ଥ୍ୟ କେନ୍ଦ୍ର ସଭାଗୃହ ଠାରେ ବ୍ଲକସ୍ତରୀୟ କୁଷ୍ଠ ରୋଗ ଚିହ୍ନଟ ଅଭିଯାନ ନେଇ ଏକ ତାଲିମ ଶିବିର ଅନୁଷ୍ଠିତ ହେଇଯାଇଛି। ଗୋଷ୍ଠୀ ଜନ ସ୍ୱାସ୍ଥ୍ୟ ଶିକ୍ଷା ଅଧିକାରୀ ହେମନ୍ତ କୁମାର ଶଗଡିଆଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅନୁଷ୍ଠିତ ହେଇ ତାଲିମ ଶିବିରରେ କଲମପୁର ବ୍ଲକ ଜନ ସ୍ୱାସ୍ଥ୍ୟ ଅଧିକାରୀ ଡାକ୍ତର ଶିବାଶିଷ ସ୍ୱାଇଁ ଯୋଗ ଦେଇ ଶିବିରକୁ ଉଦଘାଟନ କରିଥିଲେ। କଲମପୁର ଗୋଷ୍ଟୀ ସ୍ୱାସ୍ଥ୍ୟ କେନ୍ଦ୍ର ଆନୁକୂଲ୍ୟରେ ଆୟୋଜିତ ଏହି ଶିବିରରେ ସ୍ୱାସ୍ଥ୍ୟ ପରିଦର୍ଶକ, ମହିଳା ଓ ପୁରୁଷ ସ୍ୱାସ୍ଥ୍ୟ କର୍ମୀ, ସମସ୍ତ ଗୋଷ୍ଟୀ ସ୍ୱାସ୍ଥ୍ୟ ଅଧିକାରୀଙ୍କ ସମେତ ସମସ୍ତ ଆଶା କର୍ମୀ ମାନେ ଯୋଗ ଦେଇ ତାଲିମ ଗ୍ରହଣ କରିଥିଲେ।
କୁଷ୍ଠ ରୋଗରେ କିଏ ଆକ୍ରାନ୍ତ ହେଇଛି ଏବଂ ତାର କଣ ସବୁ ଲକ୍ଷଣ ରହିଛି ଏବଂ ତାକୁ କିଭଳି ଚିହ୍ନଟ କରାଯିବ ସେନେଇ ତାଲିମ ପ୍ରଦାନ କରାଯାଇଥିଲା। ବିଶେଷ କରି ଗ୍ରାମାଂଚଳର ଲୋକଙ୍କ ସହ ଆଶା କର୍ମୀଙ୍କ ସିଧା ସଳଖ ସମ୍ପୃକ୍ତି ରହିଥିବାରୁ ରୋଗୀଙ୍କ ଲକ୍ଷଣ ଜାଣିବାରେ ସହାୟକ ହେବ। ଡିସେମ୍ବର ପହିଲାରୁ ଡିସେମ୍ବର ୧୪ ତାରିଖ ପର୍ଯ୍ୟନ୍ତ ଘରକୁ ଘର ବୁଲି ଆଶା କର୍ମୀମାନେ ସର୍ଭେ କରିବେ। ଯେଉଁ ବ୍ୟକ୍ତଙ୍କୁ ଏହି ରୋଗର ଲକ୍ଷଣ ଥିବା ସନ୍ଦେହ କରାଯିବ ତେବେ ତାକୁ ଗୋଷ୍ଟୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଚିକିତ୍ସା ବ୍ୟବସ୍ତା କରାଯିବ। ୨୦୨୭ ସମଗ୍ର ଦେଶ କୁଷ୍ଠ ରୋଗ ମୁକ୍ତ କରାଯିବା ପାଇଁ ଏହି ଅଭିଯାନ ଆରମ୍ଭ ହେଇଛି।
