କଲମପୁର: ନାଗ ସାପ କାମୁଡାରେ ଜୟପାଟଣା ଅଂଚଳର ଜଣକର ମୃତ୍ୟୁ ହେଇ ସାରିଥିବା ବେଳେ କଲମପୁର ଦୁଲକିବନ୍ଧର ନାଗସାପ କାମୁଡାରେ ଆକ୍ରାନ୍ତ ଜଣେ ବ୍ୟକ୍ତି ଚିକିତ୍ସିତ ହେଇ ସୁସ୍ଥ ହେଇଛନ୍ତି। କଳାହାଣ୍ଡିର କଲମପୁର ଅଂଚଳ ସମେତ ଜୁନାଗଡ଼, ଜୟପାଟଣା ଅଂଚଳରେ ରିତିମତ ନାଗ ସାପର ପ୍ରଭାବ ଦେଖିବାକୁ ମିଳୁଛି। ବହୁ ନାଗ ସାପକୁ ସ୍ଥାନୀୟ ସ୍ନେକ ହେଲ୍ପ ଲାଇନ ସଦସ୍ୟ ମାନେ ସୁରକ୍ଷିତ ଭାବେ ଉଦ୍ଧାର କରି ନିକଟସ୍ଥ ଜଙ୍ଗଲ ଅଂଚଳରେ ଛାଡୁଛନ୍ତି ଯାହାରି ଫଳରେ ଉଭୟ ସାପ ଏବଂ ମାନବ ଜୀବନ ସୁରକ୍ଷିତ ରହି ପାରୁଛି।
ଗତ ସୋମବାର ଦିନ ଜୁନାଗଡ଼ ସହରର ଶଙ୍କର ହାର୍ଡୱେର ମାଲିକ ଶ୍ୟାମ ସୁନ୍ଦର ଅଗ୍ରୱାଲଙ୍କ ଘରରୁ ଏକକାଳୀନ ୧୦ ଗୋଟି ଛୁଆ ନାଗ ସାପକୁ ଦାସିଗାଁ ଠାରେ ରହୁଥିବା ସ୍ନେକ ହେଲ୍ପଲାଇନ ସଦସ୍ୟ ବିରେନ୍ଦ୍ର କୁମାର ସାହୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ପରବର୍ତି ସମୟରେ ପୁଣି ପଣ୍ଡରାପଲାର ସନ୍ଥ ମାଝୀଙ୍କ ଘରରୁ ଅନ୍ୟ ଏକ ନାଗ ସାପକୁ ଉଦ୍ଧାର କରିଥିଲେ। ମଙ୍ଗଳବାର ସକାଳେ ଚିଲିଗୁଡା ଗ୍ରାମର ପ୍ରେମଚନ୍ଦ ବିହାରଙ୍କ ଘରରୁ ପ୍ରାୟ ସଢେ ଛଅ ଫୁଟ ଲମ୍ବ ବିଶିଷ୍ଟ ଏକ ବିରାଟକାୟ ନାଗ ସାପକୁ ଉଦ୍ଧାର କରିଥିଲେ। ଏହାପରେ ଉଦ୍ଧାର ହେଇଥିବା ସମସ୍ତ ନାଗ ସାପକୁ କଲମପୁର ନିକଟସ୍ଥ ସିଙ୍ଗାରୀ ସଂରକ୍ଷିତ ଜଙ୍ଗଲରେ ସୁରକ୍ଷିତ ଭାବେ ଛାଡିଛନ୍ତି।
