କଂଗ୍ରେସରେ ଦକ୍ଷତା ଓ ଯୋଗ୍ୟତାର ସ୍ଥାନ ନାହିଁ: ଜ୍ୟୋତିରାଦିତ୍ୟ

ରାଜସ୍ଥାନରେ କଂଗ୍ରେସରେ ସୃଷ୍ଟି ହୋଇଛି ସଙ୍କଟ ।ଉପମୁଖ୍ୟମନ୍ତ୍ରୀ ସଚିନ ପାଇଲଟ ଦିଲ୍ଲୀରେ ସୋନିଆ ଗାନ୍ଧୀଙ୍କୁ ଭେଟିବାକୁ ଡ଼େରା ପକାଇଥିବାବେଳେ ବିଳମ୍ବିତ ରାତି ସୁଦ୍ଧା ଭେଟିବା ନେଇ କୌଣସି ସକରାତ୍ମକ ସୂଚନା ମିଳିନାହିଁ । କୁହାଯାଉଛି ସଚିନ ପାଇଲଟଙ୍କ ସହ ପାଖାପାଖି ୩୦ ଜଣ କଂଗ୍ରେସ ଓ ସ୍ବାଧୀନ ବିଧାୟକ ଯୋଗସୂତ୍ରରେ ଅଛନ୍ତି । ଏହି ବିଧାୟକମାନେ ଇସ୍ତଫା ଦେଲେ ରାଜସ୍ଥାନରେ କଂଗ୍ରେସ ସରକାର ପତନ ଘଟିପାରେ ।

ଏହି ସ୍ଥିତିରେ କିଛିମାସ ତଳେ କଂଗ୍ରେସ ଛାଡ଼ି ବିଜେପିରେ ଯୋଗ ଦେଇଥିବା ସଚିନ ପାଇଲଟଙ୍କ ଘନିଷ୍ଠ ବନ୍ଧୁ ଜ୍ୟୋତିରାଦିତ୍ୟ ସିନ୍ଧିଆ କଂଗ୍ରେସକୁ ନିଶାଣ କରିଛନ୍ତି । କଂଗ୍ରେସ ଦଳରେ ଦକ୍ଷତା ଓ ଯୋଗ୍ୟତାର ସ୍ଥାନ ନାହିଁ ବୋଲି ଜ୍ୟୋତିରାଦିତ୍ୟ କହିଛନ୍ତି ।

Sad to see my erstwhile colleague, @SachinPilot too, being sidelined and persecuted by Rajasthan CM, @ashokgehlot51 . Shows that talent and capability find little credence in the @INCIndia .

— Jyotiraditya M. Scindia (@JM_Scindia) July 12, 2020

ଏହି ଅବସରରେ ସିନ୍ଧିଆ କଂଗ୍ରେସ ଛାଡ଼ି ବିଜେପିରେ ଯୋଗ ଦେଇଥିବା ମଧ୍ୟପ୍ରଦେଶର କଂଗ୍ରେସ ବିଧାୟକ ପ୍ରଦ୍ୟୁମ୍ନ ସିଂହ ଲୋଧିଙ୍କୁ ସ୍ବାଗତ କରିଛନ୍ତି । ସିନ୍ଧିଆ କହିଛନ୍ତି ଛତରପୁର ଜିଲାର ବଡ଼ା ମଲହରା ଆସନର କଂଗ୍ରେସ ବିଧାୟକ ପ୍ରଦ୍ୟୁମ୍ନ ସିଂହ ଲୋଧି କଂଗ୍ରେସ ଛାଡ଼ି ବିଜେପି ପରିବାରରେ ସାମିଲ ହେବାରୁ ତାଙ୍କୁ ହୃଦୟରୁ ଅଭିନନ୍ଦନ । ସୂଚନାଯୋଗ୍ୟ ଯେ ଲୋଧି ଭୋପାଳରେ ଆୟୋଜିତ ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହ୍ବାନଙ୍କ ଉପସ୍ଥିତିରେ ରବିବାର ବିଜେପିରେ ସାମିଲ ହୋଇଥିଲେ ।

मध्य प्रदेश के छतरपुर जिले की बड़ा मलहरा विधानसभा सीट से कांग्रेस विधायक, प्रद्युमन सिंह लोधी जी के कांग्रेस पार्टी को छोड़कर भाजपा परिवार में शामिल होने पर उनका हृदय से अभिनंदन करता हूँ। pic.twitter.com/o4jIvFS6yQ

— Jyotiraditya M. Scindia (@JM_Scindia) July 12, 2020

ସୂଚନାଯୋଗ୍ୟ ଯେ ଚଳିତ ବର୍ଷ ମାର୍ଚ ମାସରେ ଜ୍ୟୋତିରାଦିତ୍ୟ ନିଜ ସମର୍ଥକ କୁହାଯାଉଥିବା ୬ ମନ୍ତ୍ରୀଙ୍କ ସହ ୨୨ ବିଧାୟକ କଂଗ୍ରେସରୁ ଇସ୍ତଫା ଦେଇଥିଲେ । ଫଳରେ ୧୫ ମାସର ପୁରୁଣା କଂଗ୍ରେସ ସରକାରର ପତନ ଘଟିଥିଲା ଓ ୨୦ ମାର୍ଚ​‌ରେ ମୁଖ୍ୟମନ୍ତ୍ରୀ କମଳନାଥ ଇସ୍ତଫା ଦେଇଥିଲେ ।