ହିସାର: ଜଣେ ସାମ୍ବାଦିକ ତାଙ୍କଦ୍ୱାରା ପରିଚାଳିତ ଏକ ନ୍ୟୁଜ ପୋର୍ଟାଲରେ ସମାଜରେ ଜାତିଗତ ଶତ୍ରୁତା ଏବଂ ଦଙ୍ଗା ସୃଷ୍ଟି କରିବାଭଳି ଖବର ପରିବେଷଣ କରି ଏବେ ଶେଷରେ କାଠଗଡାରେ ଛିଡା ହୋଇଛନ୍ତି। ତାଙ୍କ ବିରୋଧରେ ସାଇବର ଆତଙ୍କବାଦ ସହିତ ବିଭିନ୍ନ ସମୁଦାୟ ମଧ୍ୟରେ ଶତ୍ରୁତାଭାବକୁ ଉସୁକାଉଥିବା ଅଭିଯୋଗ ଅଣାଯାଇ ଏକ ମାମଲା ରୁଜ୍ଜୁ କରାଯାଇଛି।
ହରିଆଣା ପୋଲିସ ପକ୍ଷରୁ ଏଭଳି ସଂଗୀନ ଅଭିଯୋଗ ଅଣାଯାଇଥିବା ସାମ୍ବାଦିକ ହିସାର ବାସିନ୍ଦା। ସେ ତାଙ୍କ ନ୍ୟୁଜ ପୋର୍ଟାଲରେ ଏକ ଖବର ପ୍ରସାରଣ କରିଥିଲେ। ସେଥିରେ କୁହାଯାଇଥିଲା ଯେ ହିସାରରେ ଜାତିଆଣ ଦଙ୍ଗା ହେବାକୁ ଯାଉଛି। ଏହା ଉଭୟ ହରିଆଣା ଏବଂ ସାରା ଭାରତ ପାଇଁ ଏକ ବ୍ଲୁ ପ୍ରିଣ୍ଟ ସଦୃଶ ହେବ। ଏହି ଖବର ପ୍ରସାରିତ ହେବାପରେ ହରିଆଣା ପୋଲିସ ତାଙ୍କ ବିରୋଧରେ ଗତ ଶୁକ୍ରବାର ଦିନ ଭାରତୀୟ ଦଣ୍ଡବିଧି ଆଇନ (ଆଇପିସି) ଓ ସୂଚନା ପ୍ରଯୁକ୍ତି ଆଇନର ବିଭିନ୍ନ ଧାରାରେ ମାମଲା ରୁଜ୍ଜୁ କରିଛି। ତେବେ ଏହାକୁ ବିରୋଧୀ ଦଳଗୁଡିକ ତୀବ୍ର ସମାଲୋଚନା କରିଛନ୍ତି। ପୋଲିସ କହିଛି ଯେ ଉକ୍ତ ସାମ୍ବାଦିକଙ୍କ ବିରୋଧରେ ସମାଜର ବିଭିନ୍ନ ବର୍ଗ ମଧ୍ୟରେ ଶତ୍ରୁତାଭାବକୁ ପ୍ରୋତ୍ସାହିତ କରିବା ଏବଂ ଜାତୀୟ ସଂହତି ପ୍ରତି କ୍ଷତି ପହଞ୍ଚାଇବାଭଳି ଖବର ପ୍ରସାରଣ କରିବା ଅଭିଯୋଗ ଅଣାଯାଇଛି। ସୂଚନାଯୋଗ୍ୟ ଯେ ନୂଆ କୃଷି ଆଇନକୁ ବିରୋଧକରି ଦୀର୍ଘକାଳ ଧରି ଚାଲିଥିବା କୃଷକମାନଙ୍କର ଆନ୍ଦୋଳକୁ ଉକ୍ତ ସାମ୍ବାଦିକ ବ୍ୟାପକ ପ୍ରଚାର ପ୍ରସାର କରିଆସୁଛନ୍ତି। ତେବେ ପୋଲିସର ଏଭଳି କାର୍ଯ୍ୟାନୁଷ୍ଠାନକୁ ହରିଆଣାର ସାମ୍ବାଦିକମାନେ ତୀବ୍ର ବିରୋଧ ଓ ନିନ୍ଦା କରିଛନ୍ତି। ଉକ୍ତ ସାମ୍ବାଦିକ କହିଛନ୍ତି, ସେ ବିଭିନ୍ନ ସୂତ୍ରରୁ ପାଇଥିବା ସୂଚନା ଆଧାରରେ ହିଂସା ଘଟିପାରେ ବୋଲି ଖବର ପ୍ରସାରଣ କରିଥିଲେ। ଏହା ପଛରେ ତାଙ୍କର ମନ୍ଦ ଉଦ୍ଦେଶ୍ୟ ନଥିଲା। ସେ ଜଣେ ଦାୟିତ୍ୱସଂପନ୍ନ ନାଗରିକ ଓ ସାମ୍ବାଦିକ ଭାବରେ ନିଜ କର୍ତ୍ତବ୍ୟ କରିଛନ୍ତି।
