ସୁନ୍ଦରଗଡ଼ : ବିଧାୟକ ପ୍ରାର୍ଥୀ ଯୋଗେଶ ସିଂ, ତାଙ୍କ ଭାଇ ରିତେଶ ସିଂ ଓ ସମର୍ଥକଙ୍କ ବିରୁଦ୍ଧରେ ଅପହରଣ, ଭଙ୍ଗାରୁଜା ଓ ମହିଳା, ଛୁଆଙ୍କୁ ଆକ୍ରମଣ ସମେତ ବିଭିନ୍ନ ସଂଗିନ ଦଫାରେ ଭଷ୍ମା ଥାନାରେ ଏକ ମାମଲା ରୁଜୁ ହୋଇଛି। ଭଷ୍ମା ପୁଲିସ ୧୧ଟି ଦଫାରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
ଅଭିଯୋଗର ବିବରଣୀରୁ ପ୍ରକାଶ, ଭଷ୍ମା ଥାନା ଅନ୍ତର୍ଗତ ରାଏବଗା ଗ୍ରାମର ବୀଣା ଗହିର ବୁଧବାର ଅପରାହ୍ନରେ ଭଷ୍ମା ଥାନାରେ ପହଞ୍ଚି ଗତ ୧୭.୪.୨୦୧୯ ରାତି ୧୦ଟାରେ ବିଜେଡ଼ି ପ୍ରାର୍ଥୀ ଯୋଗେଶ ସିଂ ଓ ତାଙ୍କ ୫୦ ରୁ ୬୦ ସମର୍ଥକ ତାଙ୍କ ସହ ଅନ୍ୟମାନଙ୍କୁ ଆକ୍ରମଣ କରିବା ସହ ଜଣକୁ ଅପହରଣ କରିନେଇଥିବା ଅଭିଯୋଗ କରିଛନ୍ତି । ଅଭିଯୋଗକାରିଣୀଙ୍କ ଭାଇ ରଞ୍ଜିତ ଗହିର ମଗଧ କୁଆଡ଼େ ଯୋଗେଶ ସିଂ ଓ ତାଙ୍କ ସମର୍ଥକମାନେ ଟଙ୍କା ବାଣ୍ଟୁ ଥିବା ବେଳେ ଫଟୋ ଉଠାଇଥିବାରୁ ଏଥିରେ ପ୍ରତିଶୋଧ ପ୍ରରାୟଣ ହୋଇ ଏକାଣ୍ଡ ଭିଆଇଛନ୍ତି ବୋଲି କହିଛନ୍ତି । ଅଭିଯୋଗକାରିଣୀଙ୍କ ବାପା ତୁଳାରାମ ଗହିର ମଗଧ ଗୁରୁତର ଭାବେ ଆହତ ହୋଇ ପ୍ରଥମେ ଝାରସୁଗୁଡ଼ା ଓ ପରେ ବୁର୍ଲା ମେଡ଼ିକାଲକୁ ସ୍ଥାନାନ୍ତରିତ ହୋଇଛନ୍ତି । ପରିବାରର ସମସ୍ତ ସଦସ୍ୟ ଚିକିତ୍ସା, ଆନୁସାଙ୍ଗିକ କାର୍ଯ୍ୟରେ ବ୍ୟସ୍ତ ଓ ଭୟଭିତ ଥିବାରୁ ଏତଲା ଦେବାରେ ବିଳମ୍ବ ହେଲା ବୋଲି ଅଭିଯୋଗପତ୍ରରେ ଦର୍ଶାଇଛନ୍ତି । ଏ ସଂପର୍କରେ ମତାମତ ନେବା ପାଇଁ ଯୋଗେଶ ସିଂଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବପର ହୋଇପାରିନଥିଲା ।
