ଝାରସୁଗୁଡ଼ା: ଝାରସୁଗୁଡା ଜିଲ୍ଲା କୋରୋନା ପରିଚାଳନାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଆଜି ସନ୍ଧ୍ୟା ସାଢେ ସାତଟା ବେଳକୁ ଝାରସୁଗୁଡ଼ା ଜିଲ୍ଲା ମୁଖ୍ୟ ଡାକ୍ତରଖାନା ପଛପାଖରେ ଥିବା ସ୍ୱାବ କଲେକ୍ସନ ସେଣ୍ଟରରୁ ଜଣେ କୋରୋନା ସଂକ୍ରମିତ ଫେରାର ହୋଇ ଯାଇଥିବା ସୂଚନା ମିଳିଛି । ତାକୁ ଠାବ କରିବା ପାଇଁ ସ୍ୱାସ୍ଥ୍ୟ ବିଭାଗ ନକେଦମ ହୋଇ ପଡିଛି । ପୁଲିସ ଓ ମାଜିଷ୍ଟ୍ରେଟ ଙ୍କୁ ସୂଚନା ଦେଇ ଖୋଜା ଖୋଜି ଚଳାଇଛି ।
ଆଜି ସକାଳ ୧୦ଟା ବେଳକୁ ଜ୍ଵର କାଶ ଲକ୍ଷଣ ଥିବା କିଛି ପୁରୁଷ ଓ ମହିଳା ଙ୍କୁ ସ୍ୱାବ ପରୀକ୍ଷା ପାଇଁ ଡ଼କାଯାଇଥିଲା। ସମସ୍ତେ ନିର୍ଦ୍ଧାରିତ ସମୟରେ ପହଞ୍ଚି ଥିଲେ । କୌଣସି ଲକ୍ଷଣ ନଥିବା ସଂକ୍ରମିତଙ୍କ ସଂସ୍ପର୍ଶରେ ଆସିଥିବା କେତେକ ଲୋକ ସ୍ୱତଃ ସ୍ୱାବ ପରୀକ୍ଷା ପାଇଁ ଆସିଥିଲେ । ନମୁନା ଯାଞ୍ଚ ପରେ ଜଣେ ମହିଳା ଓ ୪ ଜଣ ପୁରୁଷ ମୋଟ ୫ ଜଣ ସଂକ୍ରମିତ ହୋଇଥିବା ଜଣାପଡି ଥିଲା । ସମସ୍ତ ୫ ଜଣଙ୍କୁ କୋଭିଡ ଡାକ୍ତରଖାନା ରେ ଭର୍ତ୍ତି ନିମନ୍ତେ ଅପେ୪ା କରିବାକୁ କୁହାଯାଇଥିଲା । ମାତ୍ର ଅପରାହ୍ନ ୫ଟା ଯାଏ ତାଙ୍କୁ ନିଆଯାଇ ନ ଥିଲା । ସମସ୍ତେ ସ୍ୱାବ କଲେକ୍ସନ ସେଣ୍ଟର ବାହାରେ ଭୋକ ଉପାସରେ ବସି ରହିଥିଲେ । ବାରମ୍ବାର ଅନୁରୋଧ ସତ୍ତ୍ୱେ ସେମାନଙ୍କ କଥା କେହି ଶୁଣି ନଥିଲେ । । ଶୌଚ ପାଇଁ ମଧ୍ୟ କୈ।ଣସି ବ୍ୟବସ୍ଥା ନ ଥିଲା । ସଂକ୍ରମିତ ହୋଇ ଥିବାରୁ ସେମାନେ ଖରାରୁ ରକ୍ଷା ପାଇଁ ଡାକ୍ତରଖାନା ଭିତରକୁ ମଧ୍ୟ ଯାଇ ପାରୁ ନଥିଲେ । ୪ ଜଣ ପୁରୁଷ ସମେତ ଜଣେ ବୟସ୍କ ମହିଳାଙ୍କୁ ଶୌଚ ପାଇଁ ବହୁ ଅସୁବିଧାର ସମ୍ମୁଖୀନ ହେବାକୁ ପଡିଲା । କୌଣସି ଆମ୍ବୁଲାନ୍ସ ନ ଆସିବାରୁ ଶେଷରେ ଜଣେ ସଂକ୍ରମିତ ଅପରାହ୍ନ ୫ଟା ବେଳକୁ କେଉଁଆଡେ ପଳାଇ ଯାଇଥିଲେ । ସକାଳ୧୦ଟାରୁ ଅପରାହ୍ନ ୫ଟା ଯାଏ ଦୀର୍ଘ ୭ଘଣ୍ଟା କାଳ ଅପେକ୍ଷା କରିବା ପରେ ଯୁବକ ଜଣକ ଫେରାର ହୋଇଯାଇଥିଲେ । ସଂଧ୍ୟା ୭ଟା୩୦ ବେଳକୁ ଆମ୍ବୁଲାନ୍ସ ଆସି ସେଠାରେ ଥିବା ଅନ୍ୟ ୪ଜଣଙ୍କୁ ଝାରସୁଗୁଡ଼ା କୋଭିଡ ଡାକ୍ତରଖାନା କୁ ନେଇଯାଇଥିଲା । ଏହି ଘଟଣାକୁ ନେଇ ଜିଲ୍ଲାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
