ଜାମ୍ମୁ : ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଜାମ୍ମୁ କାଶ୍ମୀର ପୁଲିସ୍ ହାଇ ଆଲର୍ଟ ରହିଛି। ଏହାସହ ଆତଙ୍କବାଦୀ ଆକ୍ରମଣ ଘଟଣାକୁ ରୋକିବା ପାଇଁ ପୁଲିସ୍ ପକ୍ଷରୁ ଆତଙ୍କବାଦୀଙ୍କ ପୋଷ୍ଟର ପ୍ରକାଶ ପାଇଛି। ଆତଙ୍କବାଦୀଙ୍କ ସମ୍ପର୍କରେ ତଥ୍ୟ ଦେଲେ ଏବଂ ଧରିବାରେ ସହଯୋଗ କଲେ ଆର୍ଥିକ ପୁରସ୍କାର ସହ ସରକାରୀ ଚାକିରି ଦେବାକୁ ଘୋଷଣା କରାଯାଇଛି। କିସ୍ତୱାର ପୁଲିସ୍ ପକ୍ଷରୁ ସହରର କେତେକ ସ୍ଥାନରେ ଏନେଇ ପୋଷ୍ଟର ଲଗାଯାଇଛି। ପୋଷ୍ଟରରେ ଆତଙ୍କବାଦୀ ସମ୍ପର୍କରେ ତଥ୍ୟ ଦେଲେ, ଜୀବନ୍ତ କିମ୍ବା ମୃତ ଭାବେ ଆତଙ୍କବାଦୀଙ୍କୁ ଧରିଲେ ଲକ୍ଷାଧିକ ଟଙ୍କାର ପୁରସ୍କାର ଏବଂ ସରକାରୀ ଚାକିରି ପ୍ରଦାନ କରାଯିବ ବୋଲି ଉଲ୍ଲେଖ କରାଯାଇଛି। ପୋଷ୍ଟରରେ ୭ ଜଣ ଆତଙ୍କବାଦୀଙ୍କ ଫଟୋ ରହିଛି। ସେଥିମଧ୍ୟରେ କୁଖ୍ୟାତ ଆତଙ୍କବାଦୀ ମହମ୍ମଦ ଅମୀନ ଓରଫ ଜାହାଙ୍ଗିର, ରିୟାହ ଅହମଦ ଓରଫ ହଜାରୀ, ଓସାମାବିନ ଜାଭେଦ ଓରଫ ଓସାମା, ମୁଦ୍ଦସିର ହୁସେନ, ତାଲିବ ହୁସେନ, ଜମାଲଦୀନ ଏବଂ ଜୁନେଦ ଅକ୍ରମର ଫଟୋ ରହିଛି। ଆତଙ୍କବାଦୀଙ୍କ ସମ୍ପର୍କରେ ତଥ୍ୟ ଦେବା ଲୋକଙ୍କ ପରିଚୟ ଗୁପ୍ତ ରଖାଯିବ ବୋଲି କୁହାଯାଇଛି।
