ମାର୍ଚ୍ଚ ୨୨ରୁ ମେ’ ୨୬ ପର୍ଯ୍ୟନ୍ତ ଆଇପିଏଲ୍‌ !

ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍‌(ଆଇପିଏଲ)-୨୦୨୪ ଆସନ୍ତା ମାର୍ଚ୍ଚ ୨୨ରୁ ଖେଳାଯିବା ନେଇ ବିସସିଆଇ ଯୋଜନା କରୁଛି। ଚେନ୍ନଇର ଏମ୍‌ ଚିଦାମ୍ବରମ ଷ୍ଟାଡ଼ିୟମରେ ଗତଥରର ବିଜେତା ଚେନ୍ନଇ ସୁପରକିଙ୍ଗ୍‌ସ ଉଦ୍‌ଘାଟନୀ ମ୍ୟାଚ ଖେଳିବ। ସାଧରଣ ନିର୍ବାଚନକୁ ଦୃଷ୍ଟିରେ ରଖି କାର୍ଯ୍ୟସୂଚୀ ଦୁଇଟି ପର୍ଯ୍ୟାୟରେ ଘୋଷଣା କରାଯିବ। ପ୍ରଥମ ପର୍ଯ୍ୟାୟ କାର୍ଯ୍ୟସୂଚୀ ଖୁବଶୀଘ୍ର ଘୋଷଣା କରାଯିବ ବୋଲି ଆଇପିଏଲ ପରିଚାଳନା ପରିଷଦ ଅଧ୍ୟକ୍ଷ ଅରୁଣ ଧୁମଲ ଷ୍ଟାରସ୍ପୋର୍ଟସ୍‌କୁ ଦେଇଥିବା ସାକ୍ଷାତକାରରେ କହିଛନ୍ତି। ଦେଶରେ ହେବାକୁ ଥିବା ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଆଇପିଏଲ କାର୍ଯ୍ୟସୂଚୀ ପ୍ରସ୍ତୁତ କରାଯିବ। ପ୍ରଥମ ପର୍ଯ୍ୟାୟ କାର୍ଯ୍ୟସୂଚୀ ଖୁବଶୀଘ୍ର ଘୋଷଣା କରାଯିବ। ପ୍ରଥମ ପର୍ଯ୍ୟାୟରେ ମାତ୍ର ୧୫ ଦିନ ଲାଗି କାର୍ଯ୍ୟସୂଚୀ ଘୋଷଣା କରାଯିବ। ନିର୍ବାଚନ ତାରିଖ ଘୋଷଣା ପରେ ଦ୍ବିତୀୟ ପର୍ଯ୍ୟାୟ କାର୍ଯ୍ୟସୂଚୀ ଘୋଷିତ ହେବ। ବିଭିନ୍ନ ଫ୍ରାଞ୍ଚାଇଜମାନଙ୍କ ସହିତ ଆଲୋଚନା କରାଯାଇ କାର୍ଯ୍ୟସୂଚୀ ଘୋଷଣା କରାଯିବ ବୋଲି ଧୁମଲ କହିଛନ୍ତି। ଆମେରିକା ଓ ୱେଷ୍ଟଇଣ୍ଡିଜରେ ଖେଳାଯିବାକୁ ଥିବା ଟି୨୦ ବିଶ୍ବକପକୁ ଦୃଷ୍ଟିରେ ରଖି ମେ ସୁଦ୍ଧା ଆଇପିଏଲ ଶେଷ କରାଯିବ। ମେ ୨୬ରେ ଫାଇନାଲ ଖେଳାଯିବାକୁ ଯୋଜନା ରହିଛି ବୋଲି ଧୁମଲ କହିଛନ୍ତି। ଆଇପିଏଲ ଭାରତରେ ଆୟୋଜିତ ହେବ। ସାଧାରଣ ନିର୍ବାଚନ ଲାଗି ଭାରତ ବାହାରକୁ ଆଇପିଏଲ ଯିବାର କୌଣସି ଯୋଜନା ନାହିଁ ବୋଲି ଧୁମଲ ସ୍ପଷ୍ଟ କରିଛନ୍ତି। ୨୦୨୪ ଆଇପିଏଲ ଭାରତ ବାହାରେ ଖେଳାଯିବା ନେଇ ପ୍ରଥମରୁ ଚାଲିଥିବା ଚର୍ଚ୍ଚା ଶେଷରେ ପୂର୍ଣ୍ଣଚ୍ଛେଦ ପଡ଼ିଛି।