ନୂଆଦିଲ୍ଲୀ: ଅନ୍ତର୍ଜାତୀୟ ଶୁଟିଂ କ୍ରୀଡ଼ା ମହାସଂଘ(ଆଇଏସଏସଏଫ) ପକ୍ଷରୁ ଦିଲ୍ଲୀରେ ଚାଲିଥିବା ଶୁଟିଂ ବିଶ୍ଵକପ ପ୍ରତିଯୋଗିତା ପାଇଁ ଭାରତ ପକ୍ଷରୁ ୨ ପାକିସ୍ତାନୀ ଶୁଟରଙ୍କୁ ଭିଜା ଅନୁମତି ଦିଆ ନ ଯିବା ପରେ ଅସନ୍ତୋଷ ପ୍ରକାଶ କରିଛି ଅନ୍ତର୍ଜାତୀୟ ଅଲିମ୍ପିକ କମିଟି(ଆଇଓସି)। ଆଗାମୀ ଦିନରେ ଭାରତରେ କୌଣସି ପ୍ରକାର ଅନ୍ତର୍ଜାତୀୟ ପ୍ରତିଯୋଗିତା ଆୟୋଜନ ଉପରେ ଆଇଓସି କଟକଣା ଲାଗୁ କରିଛି। ପାକିସ୍ତାନୀ ଶୁଟରଙ୍କୁ ଭିଜା ନ ଦେଇ ଭାରତ ଅଲିମ୍ପିକ ଚାର୍ଟରକୁ ଉଲ୍ଲଂଘନ କରିଥିବା ଆଇଓସି ଦର୍ଶାଇବା ସହ ଭାରତରେ କୌଣସି ଅନ୍ତର୍ଜାତୀୟ କ୍ରୀଡ଼ା ଆୟୋଜନ ନ କରିବାକୁ ଅନ୍ୟ ସମସ୍ତ ଦେଶର କ୍ରୀଡ଼ା ସଂଘଗୁଡ଼ିକୁ ନିବେଦନ କରିଛି।
ଭିଜା ନ ଦେବା ନିଷ୍ପତ୍ତି ପରେ ଆଇଓସି ଭାରତ ସହ ସମସ୍ତ ପ୍ରକାର କଥାବାର୍ତ୍ତା ବନ୍ଦ କରିଦେଇଛି। ଭାରତ ଯେପର୍ଯ୍ୟନ୍ତ ଅଲିମ୍ପିକ ଚାର୍ଟରକୁ ସମ୍ପୂର୍ଣ୍ଣ କରିବା ଲାଗି ସରକାରଙ୍କୁଠାରୁ ଅନୁମତି ନ ଆଣିଛି ସେ ପର୍ଯ୍ୟନ୍ତ ସେଠାରେ କୌଣସି ପ୍ରକାର ଖେଳ ଆୟୋଜନ ହେବ ନାହିଁ।
ସୂଚନାଯୋଗ୍ୟ, ଦିଲ୍ଲୀରେ ଗୁରୁବାରଠାରୁ ଆଇଏସଏସଏଫର ଶୁଟିଂ ବିଶ୍ଵକପ ପ୍ରତିଯୋଗିତା ଆରମ୍ଭ ହୋଇଛି। ଏଥିରେ ଭାଗ ନେବା ଲାଗି ପାକିସ୍ତାନ ପକ୍ଷରୁ ୨ ଶୁଟର ଜି.ଏମ. ବସୀର ଏବଂ ଖଲିଳ ଅହମ୍ମଦଙ୍କ ଲାଗି ଭାରତକୁ ଭିଜା ଅନୁମତି ମଗାଯାଇଥିଲା। ମାତ୍ର ପୁଲୱାମା ଆକ୍ରମଣ ଘଟଣା ପରେ ଭାରତ ଉଭୟ ଖେଳାଳିଙ୍କୁ ଭିଜା ଦେଇ ନ ଥିଲା।
