ପାକିସ୍ତାନରେ ଅବତରଣ କଲା ହାଇଦ୍ରାବାଦ ଆସୁଥିବା ଇଣ୍ଡିଗୋ ବିମାନ
![](https://samajalive.in/wp-content/uploads/2022/07/befunky_2022-6-0_12-0-28-1068x715-1-650x430.jpg)
ନୂଆଦିଲ୍ଲୀ: ୟୁଏଇର ଶାରଜାହରୁ ଆସୁଥିବା ଏକ ଇଣ୍ଡିଗୋ ବିମାନ ପାକିସ୍ତାନର କରାଚୀରେ ଜରୁରୀକାଳୀନ ଅବତରଣ କରିଛି । କିଛି ଯାନ୍ତ୍ରୀକ ତ୍ରୁଟି ଦେଖାଦେବାରୁ କରାଚିରେ ବିମାନଟି ଜରୁରୀ ଅବତରଣ କରିଥିବା ଜଣାପଡ଼ିଛି । ମିଳିଥିବା ସୂଚନା ଅନୁଯାୟୀ ବିମାନରେ ଯାତ୍ରା କରୁଥିବା ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । ଘଟଣାକୁ ନେଇ ଇଣ୍ଡିଗୋ ଏୟାରଲାଇନ୍ସ ପକ୍ଷରୁ ସୂଚନା ଦିଆଯାଇଛି । ଇଣ୍ଡିଗୋ ଏୟାରଲାଇନ୍ସ କହିଛି ଯେ ବିମାନରେ ଯାନ୍ତ୍ରୀକ ତ୍ରୁଟି ଯୋଗୁ ସତର୍କତା ଅବଲମ୍ବନ କରିବାକୁ ବିମାନଟି ପାକିସ୍ତାନର କରାଚିକୁ ଯାତ୍ରା କରିଥିଲା । ସେଠାରେ ବିମାନଟି ଅବତରଣ କରିଛି । ଯାତ୍ରୀମାନଙ୍କୁ ସେଠାରୁ ହାଇଦ୍ରାବାଦ ନେବା ପାଇଁ ଏକ ବିମାନ ପଠାଯାଇଛି । ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । ସମସ୍ତ ପରିସ୍ଥିତି ଠିକ୍ ରହିଛି ବୋଲି ସୂଚନା ଦେଇଛନ୍ତି ଇଣ୍ଡିଗୋ ଏୟାରଲାଇନ୍ସ କର୍ତ୍ତୃପକ୍ଷ ।
ସୂଚନା ଥାଉ କି ଏହା ପୂର୍ବରୁ କରାଚିରେ ଜୁଲାଇ ୫ତାରିଖରେ ସ୍ପାଇସଜେଟ୍ ବିମାନ ଅବତରଣ କରିଥିଲା । ବିମାନଟିର ନାଁ ସ୍ପାଇସଜେଟ୍ ଏସଜି-୧୧ ରହିଥିବା ବେଳେ ଏହା ଦିଲ୍ଲୀରୁ ଦୁବାଇ ଅଭିମୁଖେ ଯାତ୍ରା କରୁଥିଲା । ହେଲେ କିଛି ବୈଷୟିକ ତ୍ରୁଟିକାରଣରୁ ପାକିସ୍ତାନର କରାଚିରେ ଜରୁରୀ ଅବତରଣ କରାଯାଇଥିଲା । ଦୁଇ ସପ୍ତାହ ମଧ୍ୟରେ କରାଚିରେ ଅବତରଣ କରିବାରେ ଏହା ହେଉଛି ଦ୍ୱିତୀୟ ଭାରତୀୟ ବିମାନ।
Comments are closed.