ସମାଜ ଡିଜିଟାଲ ଡେସ୍କ: ସୋସିଆଲ ମିଡ଼ିଆରେ ଭାଇରାଲ ହେଲା ମୟୂରକୁ ମାରି ତରକାରୀ ପ୍ରସ୍ତୁତ କରି ଖାଇବାର ଭିଡ଼ିଓ । ଆମର ଜାତୀୟ ପକ୍ଷୀ ମୟୂରକୁ ମାରି ତାର ମାଂସକୁ ରୋଷେଇ କରି ଖାଉଥିଲେ ଜଣେ ୟୁଟ୍ୟୁବର । ଭିଡ଼ିଓ କରି ଲକ୍ଷ ଲକ୍ଷ ଭ୍ୟୁ ପାଇବା ଓ ରାତାରାତି ଦର୍ଶକଙ୍କ ପାଖରେ ପ୍ରସିଦ୍ଧ ହେବେ ବୋଲି ଭାବିଥିଲେ । ଲକ୍ଷ ଲକ୍ଷ ଭ୍ୟୁ ମଧ୍ୟ ହାତେଇଥିଲେ । ହେଲେ ଏଭଳି ଭିଡ଼ିଓ କରିବା ତାଙ୍କ ପାଇଁ ମହଙ୍ଗା ପଡିଛି । ଏଭଳି ଜଣେ ୟୁଟ୍ୟୁବର ହେଲେ ତେଲେଙ୍ଗାନା ସିରସିଲାର ପ୍ରଣୟ କୁମାର ।
ସୂଚନା ଅନୁସାରେ ବନ୍ୟଜନ୍ତୁ ସୁରକ୍ଷା ଆଇନକୁ ଉଲ୍ଲଘଂନ କରି ସଂରକ୍ଷିତ ପ୍ରଜାତି ତଥା ଜାତୀୟ ପକ୍ଷୀ ମୟୂରକୁ ହତ୍ୟା କରିଛନ୍ତି ପ୍ରଣୟ । ଖାଲି ସେତିକି ନୁହେଁ ମୟୂରକୁ ମାରି ତେଲ ମସଲା ଦେଇ ଭଲ ଭାବରେ ରାନ୍ଧି ଖାଇଛନ୍ତି ମଧ୍ୟ । ପ୍ରଣୟ ବିଭିନ୍ନ ପ୍ରକାର ରୋଷେଇ କରୁଥିବାରୁ ଭିଡ଼ିଓ ରେକର୍ଡ କରି ତାହାକୁ ନିଜର ୟୁଟ୍ୟୁବ ଚ୍ୟାନେଲରେ ଅପଲୋଡ କରିଥାନ୍ତି । କିଛି ଦିନ ତଳେ ସେ ମୟୂରକୁ ମାରି ତରକାରୀ କରି ଖାଉଥିବାର ଭିଡ଼ିଓ ‘ଟ୍ରାଡିସନାଲ ପିକକ୍ କରି ରେସିପି’ ଟାଇଟଲ ଦେଇ ଏକ ଭିଡ଼ିଓ ଅପଲୋଡ କରିଥିଲେ । ଭିଡ଼ିଓଟି ସୋସିଆଲ ମିଡ଼ିଆରେ ଖୁବ ଭାଇରାଲ ହୋଇଥିଲା । ହେଲେ କିଛି ୟୁଜର୍ସ ଏହାକୁ କଡା ନିନ୍ଦା କରିବା ସହ ପ୍ରଣୟଙ୍କୁ ଗିରଫ କରିବାକୁ ଦାବି କରିଥିଲେ । ବେଆଇନ ଭାବେ ଜାତୀୟ ପକ୍ଷୀକୁ ହତ୍ୟା କରିବା ନେଇ ବିନବିଭାଗ ନିକଟରେ ଅଭିଯୋଗ ହୋଇଥିଲା । ଅବୈଧ ବନ୍ୟଜନ୍ତୁ ଶିକାର କରି ଖାଇବା ଅଭିଯୋଗରେ ବନ ବିଭାଗ ପ୍ରଣୟଙ୍କୁ ଗିରଫ କରିଛି । ଏହାସହିତ ଯେଉଁ ସ୍ଥାନରେ ପ୍ରଣୟ ମୟୂର ତରକାରୀ ପ୍ରସ୍ତୁତ କରିଥିଲେ ସେଠାକୁ ବନବିଭାଗର ଏକ ଟିମ ଯାଇ ଛାନଭିନ କରିଥିଲେ । ସେଠାରୁ ରକ୍ତ ଛିଟା ପଡିଥିବା ଦେଖିବାକୁ ମିଳିଥିବା ବେଳେ ବିଭିନ୍ନ ପ୍ରକାର ନମୁନା ସଂଗ୍ରହ କରାଯାଇ ପରୀକ୍ଷା କରିବାକୁ ପଠାଯାଇଛି । ଏହାସହିତ ବଳକା ଥିବା ତରକାରୀ ମଧ୍ୟ ଯାଞ୍ଚ ପାଇଁ ଦିଆଯାଇଛି ।
ପ୍ରଣୟଙ୍କୁ ଜେରା ବେଳେ ସେ ପୁଲିସ ପାଖରେ ସତ ସ୍ୱୀକାର କରିବା ସହ ନିଜର ସବସ୍କ୍ରାଇବର ବଢାଇବା ପାଇଁ ଏଭଳି କରିଥିବା କହିଛି । ତେବେ ବନ୍ୟଜନ୍ତୁ ସୁରକ୍ଷା ଆଇନ ଅନୁସାରେ ପ୍ରଣୟଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି ବନବିଭାଗ ।
