ନୂଆଦିଲ୍ଲୀ: ଚଳିତ ଲୋକସଭା ନିର୍ବାଚନ ଶେଷ ହେବାକୁ ଆଉ ୪ଟି ପର୍ଯ୍ୟାୟ ବାକି ଥିବା ବେଳେ, ଯେ କୌଣସି ଦଳ ସରକାର ଗଠନ କଲେ ମଧ୍ୟ ଆନ୍ତର୍ଜାତିକ ବଜାରରେ ବୃଦ୍ଧି ପାଉଥିବା ତୈଳ ଦର ଭାରତୀୟ ଉପଭୋକ୍ତାଙ୍କ ପାଇଁ ବଡ଼ ବୋଝ ସଦୃଶ ହୋଇପାରେ। ତୈଳ ଆମଦାନୀ ଉପରେ ନିର୍ଭର କରୁଥିବା ଭାରତ ପାଇଁ ଏହାର ଦର ବୃଦ୍ଧି ଅର୍ଥ ବ୍ୟବସ୍ଥାକୁ ଦୁର୍ବଳ କରିବା ସହ ଉଚ୍ଚ ମୁଦ୍ରାସ୍ପିତି ଏବଂ ଅନ୍ୟାନ୍ୟ ଆର୍ଥିକ ଦୁର୍ବଳ ପରିସ୍ଥିତି ସୃଷ୍ଟି ହେବା ନେଇ ଅର୍ଥନୀତିଜ୍ଞମାନେ ଆଶଙ୍କା ପ୍ରକାଶ କରିଛନ୍ତି।
ତେବେ ରାଜ୍ୟ ସ୍ଥରରେ ପରିଚାଳିତ ତେଲ କମ୍ପାନୀ ଏବଂ କ୍ଷୁଦ୍ର ବ୍ୟବସାୟୀ ୧୧ ଏପ୍ରିଲରୁ ଲୋକସଭା ନିର୍ବାଚନ ପ୍ରଥମ ପର୍ଯ୍ୟାୟରୁ ମେ ୨୩ ପର୍ଯ୍ୟନ୍ତ ତେଲ ଦରକୁ ସ୍ଥିର ରଖିପାରିଥିଲେ ମଧ୍ୟ ଆଗାମୀ ଦିନରେ ତୈଳ ଦର ଆକାଶ ଛୁଆଁ ହେବା ନିଶ୍ଚିତ ଥିବା ଅର୍ଥନୀତିଜ୍ଞମାନେ କହିଛନ୍ତି। ନିର୍ବାଚନ ଶେଷ ହେବା ପରେ ତେଲ ଦର ବୃଦ୍ଧି ପାଇବା ଏକ ପ୍ରକାର ନିଶ୍ଚିତ ହୋଇଥିବା ବେଳେ ନିର୍ବାଚନକୁ ଦୃଷ୍ଟିରେ ରଖି ତେଲ ଦର ବୃଦ୍ଧି ନ ପାଇବା ଯୋଗୁ ଏବେ ହେଉଥିବା କ୍ଷତି ଭରଣା ପାଇଁ ମଧ୍ୟ ଅଧିକ ଟିକସ ଲାଗୁ ହେବା ସମ୍ଭାବନା ରହିଛି।
ବିରୋଧୀ କଂଗ୍ରେସ ପାର୍ଟିର ଅଭିଯୋଗ ଅନୁଯାୟୀ ମୋଦୀ ସରକାର ଦୈନଦିନ ଭିତ୍ତିରେ ଦର ପରିବର୍ତ୍ତନ ବ୍ୟବସ୍ଥାକୁ ଲାଗୁ ନ କରି, ରାଜ୍ୟ ସ୍ଥରୀୟ ତେଲ କମ୍ପାନୀଗୁଡିକୁ ଦର ସ୍ଥିର ରଖିବାକୁ କହିଛି। ସରକାର ଟିକସ କାଟ କରିବା ଉଚିତ ନ ହେଲେ ନିର୍ବାଚନ ପରେ ଉପଭୋକ୍ତାଙ୍କୁ ବହୁତ ଅଧିକ ଦର ଦେବାକୁ ପଡିବ ବୋଲି ବରିଷ୍ଠ କଂଗ୍ରେସ ନେତା ଅଖିଳେଶ ପ୍ରତାପ ସିଂହ କହିଛନ୍ତି।
Comments are closed.