ନୂଆଦିଲ୍ଲୀ: ପ୍ରତିରକ୍ଷା କ୍ଷେତ୍ରରେ ଭାରତ ଏକ ବଡ଼ ସଫଳତା ହାସଲ କରିଛି। ସ୍ଵଦେଶୀ କ୍ଷେପଣାସ୍ତ୍ର ‘ପ୍ରଳୟ’ର ହୋଇଛି ସଫଳ ପରୀକ୍ଷଣ। ଜୁଲାଇ ୨୮ ଓ ୨୯ ତାରିଖରେ ଓଡ଼ିଶା ଉପକୂଳର ବାଲେଶ୍ବରର ଚାନ୍ଦିପୁରସ୍ଥିତ ଡକ୍ଟର ଏପିଜେ ଅବଦୁଲ କଲାମ ଦ୍ୱୀପରୁ ଲଗାତର ଦୁଇଥର କ୍ଷେପଣାସ୍ତ୍ରର ସଫଳ ପରୀକ୍ଷଣ କରାଯାଇଛି। ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ(ଡିଆରଡିଓ) ମଙ୍ଗଳବାର ଏନେଇ ସୂଚନା ଦେଇଛି। କ୍ଷେପଣାସ୍ତ୍ରଟି କେତେ ସଠିକ ଭାବରେ କମ୍ ଏବଂ ଅଧିକ ଦୂରତାରେ ଆକ୍ରମଣ କରିପାରିବ ତାହା ଦେଖିବା ପାଇଁ ସେନାର ଆବଶ୍ୟକତା ଅନୁଯାୟୀ ଏହି ପରୀକ୍ଷଣ କରାଯାଇଥିଲା। ଦୁଇ ଥର ଯାକ କ୍ଷେପଣାସ୍ତ୍ରଟି ସଠିକ୍ ଭାବରେ ଲକ୍ଷ୍ୟଭେଦ କରିଛି ଏବଂ ସମସ୍ତ ବୈଷୟିକ ମାପଦଣ୍ଡ ପୂରଣ କରିଛି।
