ସମାଜ ଡିଜିଟାଲ ଡେସ୍କ: ଇଂଲଣ୍ଡ ବିପକ୍ଷ ଟେଷ୍ଟ ମ୍ୟାଚରେ ଭାରତ ୨ୟ ଇନିଂସରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ସଂଘର୍ଷ କରୁଛି। ୪ର୍ଥ ଦିନ ଖେଳ ଜାରି ରହିଥିବାବେଳେ ଟିମ ଇଣ୍ଡିଆ ୩ ଉଇକେଟ ବିନିମୟରେ ୧୪୭ ରନ ସଂଗ୍ରହ କରିଛି। ଫଳରେ ପ୍ରଥମ ଇନିଂସର ୬ ରନକୁ ମିଶାଇ ପ୍ରଥମ ସେସନ ସୁଦ୍ଧା ୧୫୩ ରନରେ ଆଗୁଆ ରହିଛି। ୨ୟ ଇନିଂସରେ କେ.ଏଲ. ରାହୁଲ ୭୧ ଏବଂ ରୁଷଭ ପନ୍ତ ୨୭ ରନ କରି ଅପରାଜିତ ରହିଛନ୍ତି। ୯୨ ରନରେ ଦଳ ୩ଟି ଉଇକେଟ ହରାଇଥିବାବେଳେ କେ.ଏଲ. ରାହୁଲ ଏବଂ ରୁଷଭ ପନ୍ତ ଦଳର ସ୍ଥିତି ସମ୍ଭାଳିଛନ୍ତି। ପ୍ରଥମ ଇନିଂସରେ ଶତକୀୟ ଇନିଂସ ଖେଳିଥିବା ଯଶସ୍ଵୀ ଜୟସଓ୍ବାଲ ଏବଂ ଶୁବମନ ଗିଲ ବିଫଳ ହୋଇଛିନ୍ତି। ଜୟସଓ୍ବାଲ ୪ ଏବଂ ଗିଲ୍ ୮ ରନ କରି ଆଉଟ ହୋଇଥିବାବେଳେ ସାଇ ସୁଦର୍ଶନ ୩୦ ରନରେ ଆଉଟ ହୋଇଛନ୍ତି। ଇଂଲଣ୍ଡ ପକ୍ଷରୁ ବ୍ରାଇଡନ କାର୍ସେ ୨ଟି ଏବଂ ବେନ ଷ୍ଟୋକ୍ସ ଗୋଟିଏ ଉଇକେଟ ନେଇଛନ୍ତି।
ପ୍ରଥମ ଇନିଂସରେ ଭାରତ ୪୭୧ ରନ ସଂଗ୍ରହ କରିଥିଲା। ଜୟସଓ୍ବାଲ, ଗିଲ୍ ଏବଂ ପନ୍ତ ଶତକୀୟ ଇନିଂସ ଖେଳିଥିଲେ। ଏହାର ଜବାବରେ ଇଂଲଣ୍ଡ ୪୬୫ ରନ କରିଥିଲା। ଯାହାଫଳରେ ଭାରତ ପ୍ରଥମ ଇନିଂସରେ ମାତ୍ର ୬ ରନରେ ଆଗୁଆ ରହିଥିଲା। ଭାରତୀୟ ବୋଲର ଯଶପ୍ରୀତ ବୁମରା ସର୍ବାଧିକ ୫ ଉଇକେଟ ନେଇଥିବାବେଳେ ପ୍ରସିଦ୍ଧ କ୍ରିଷ୍ଣା ୩ ଏବଂ ମହମ୍ମଦ ସିରାଜ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
