ପାଟଣା: କେନ୍ଦୁଝର ଜିଲା ପାଟଣା ବନାଞ୍ଚଳରେ କାଠ ମାଫିଆ ସକ୍ରିୟ ହୋଇଛନ୍ତି। ଦିନ ଦ୍ୱିପ୍ରହରରେ ମେଶିନ ଲଗାଇ ବଡ଼ ବଡ଼ ଗଛ କାଟି ଟ୍ରକ ସାହାଯ୍ୟରେ ଚାଲାଣ କରୁଛନ୍ତି। ସବୁ ଜାଣି ନ ଜାଣିଲା ଭଳି ଚୁପ ବସିଛି ବନ ବିଭାଗ।
ପାଟଣା ବନାଞ୍ଚଳ କେନ୍ଦେଇପଶି ବିଟ୍ ଅନ୍ତର୍ଗତ ଜହ୍ନେଇପଶି ଗ୍ରାମ୍ୟ ଜଙ୍ଗଲରୁ ମାଫିଆମାନେ ବଡ଼ବଡ଼ ୟୁକାଲିପଟାସ ଗଛ କାଟି ଟ୍ରକରେ ଚାଲାଣ କରୁଥିବା ଅଭିଯୋଗ ହୋଇଛି। ମାଫିଆମାନେ ଚଞ୍ଚକତା କରି ପ୍ରଥମେ କିଛି ପଟ୍ଟା ଭୁକ୍ତ ଜାଗା ଦେଖାଇ ଗଛ କାଟିବା ପାଇଁ ଅନୁମତି ପାଇବା ପରେ ସେହି ଅନୁମତିରେ ଅନ୍ୟ ଅଞ୍ଚଳରେ ସରକାରୀ ଜାଗାରେ ଥିବା ଶହ ଶହ ଗଛ କାଟି ନେଉଛନ୍ତି।
ଏ ନେଇ ପାଟଣା ବନାଞ୍ଚଳ ଅଧିକାରୀ ବନବିହାରୀ ସର୍ଦ୍ଦାରଙ୍କୁ ପଚାରିବାରୁ ପଟ୍ଟା ଭୁକ୍ତ ଜାଗାରୁ ଗଛ କଟାଯାଉଥିବା କହିଥିବା ବେଳେ କଟାଯାଇଥିବା ଗଛ ମଧ୍ୟରୁ କିଛି କାଠ ଜବତ କରାଯାଇ ଟ୍ରାକ୍ଟର ସହାୟତାରେ ଖୀରେଇଟାଙ୍ଗିରୀ ବନ କାର୍ୟ୍ୟାଳୟକୁ ଅଣାଯାଇଥିବା ସୂଚନା ଦେଇଛନ୍ତି। ଅନ୍ୟ ପଟେ ପ୍ରଚଣ୍ଡ ରୌଦ୍ରତାପ ସମୟରେ ଗଛ କଟାଯାଉଥିବାରୁ ପରିବେଶବିତଙ୍କ ମନରେ ଅସନ୍ତୋଷ ଦେଖା ଦେବା ସହ କାଠ ମାଫିଆଙ୍କ ବିରୋଧରେ କାର୍ୟ୍ୟାନୁଷ୍ଠାନ ନେବାକୁ ବିଭିନ୍ନ ମହଲରେ ଦାବି ହୋଇଛି।
