ଆଇଜଲ : ସରା ଦେଶରେ ଏବଂ ନିର୍ବାଚନର ବାତାବରଣ। ମତଦାତାଙ୍କୁ ଆକୃଷ୍ଟ କରିବା ପାଇଁ ସମସ୍ତେ ବ୍ୟସ୍ତ। ସବୁ ଯୋଗ୍ୟ ମତଦାତା ଯେପରି ନିଜର ମତାଧିକାର ସାବ୍ୟସ୍ତ କରନ୍ତି ସେଥିପାଇଁ ପ୍ରୟାସ କରାଯାଉଛି। ତେବେ ଗୋଟିଏ ପରିବାରରେ କେତେଜଣ ମତଦାତା ଥିବା ଆପଣ କହି ପାରିବେ। ତେବେ ମିଜୋରାମରେ ଅଛି ଏପରି ଏକ ପରିବାର ଯେଉଁଠି ମତଦାତାଙ୍କ ସଂଖ୍ୟା ଶହେ ପାଖାପାଖି।
ମିଜୋରାମର ଏକମାତ୍ର ଲୋକସଭା ଆସନ ଏବଂ ଆଇଜଲ ପଶ୍ଚିମ ବିଧାନସଭା ଆସନ ପାଇଁ ପ୍ରଥମ ପର୍ଯ୍ୟାୟରେ ଏକ ସଙ୍ଗେ ନିର୍ବାଚନ ଅନୁଷ୍ଠିତ ହେବ । ଲୋକସଭା ନିର୍ବାଚନ ପାଇଁ ୬ ଜଣ ପ୍ରାର୍ଥୀ ପ୍ରଚାର ଅଭିଯାନ ଆରମ୍ଭ କରି ଦେଇଛନ୍ତି । ତେବେ ମତଦାନ ପାଇଁ ପ୍ରସ୍ତୁତ ହୋଇ ରହିଛନ୍ତି ଏଠାରେ ବସବାସ କରୁଥିବା ବିଶ୍ୱର ସର୍ବ ବୃହତ ପରିବାର। କାରଣ ଏହି ପରିବାର ୯୮ଟି ଭୋଟ କୌଣସି ପ୍ରାର୍ଥୀଙ୍କ ବିଜୟ ଅବା ପରାଜୟ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିବ।
ଟ୍ରୁଇକୁମ୍ ବିଧାନସଭା ନିର୍ବାଚନ ମଣ୍ଡଳୀରେ ରହୁଥିବା ବିଶ୍ୱର ସବୁଠାରୁ ବଡ଼ ପରିବାରର ମୁଖିଆ ହେଉଛନ୍ତି ଜିଓନା ଚାନା। ତାଙ୍କ ପରିବାରର ମୋଟ ସଦସ୍ୟଙ୍କ ସଂଖ୍ୟା ପ୍ରାୟ ୨୦୦ । ୭୪ ବର୍ଷ ବୟସ୍କ ଜିଓନାଙ୍କ ୩୮ ପତ୍ନୀ, ୩୨ ପୁଅ ଏବଂ ୧୮ ଜଣ ଝିଅ ଅଛନ୍ତି । ତାଙ୍କ ନାତି-ନାତୁଣୀଙ୍କ ସଂଖ୍ୟା ହେଉଛି ୩୩ । ପରିବାର ସମସ୍ତ ସଦସ୍ୟ ଏକ ଚାରି ମହଲା କୋଠାରେ ଏକାଠି ରହୁଛନ୍ତି। ତେବେ ଏହି ପରିବାରରେ ୯୮ ଜଣ ମତଦାତା ଅଛନ୍ତି । ଯେଉଁମାନଙ୍କର ଭୋଟ ସମଗ୍ର ନିର୍ବାଚନ ମଣ୍ଡଳୀରେ ବେଶ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବ।
ରାଜ୍ୟର ଶେରଛିପ ଜିଲ୍ଲାରେ ରହୁଥିବା ଜିଓନା ଚାନାଙ୍କ ପରିବାର ମତଦାନ ପାଇଁ ବେଶ ଉତ୍ସାହିତ ଅଛନ୍ତି। ଏହି ଛୋଟ ପର୍ବତୀୟ ରାଜ୍ୟରେ ଜିତିବା ଏବଂ ହାରିବାର ବ୍ୟବଧାନ ବହୁତ କମ୍ ଥାଏ, ତେବେ ଚାନାଙ୍କ ପରିବାରର ୯୮ଟି ଭୋଟ ଯେ କୌଣସି ପ୍ରାର୍ଥୀଙ୍କ ଭାଗ୍ୟ ବଦଳାଇବାରେ ପ୍ରମୁଖ ଭୂମିକା ଗ୍ରହଣ କରିବ।
