ନୂଆଦିଲ୍ଲୀ: ଆଇପିଏଲ ୨୦୨୪ ମହାସମର ଖୁବଶୀଘ୍ର ଆରମ୍ଭ ହେବାକୁ ଯାଉଛି । ସବୁ ଦଳର ଖେଳାଳୀମାନେ ଏଥିପାଇଁ ଜୋରଦାର ପ୍ରସ୍ତୁତି କରୁଛନ୍ତି । ହାର୍ଦ୍ଦିକ ପାଣ୍ଡ୍ୟା ବି ଏହି ତାଲିକାରେ ସାମିଲ ଅଛନ୍ତି । ହାର୍ଦ୍ଦିକ ବିଶ୍ୱକପ ଖେଳିବା ବେଳେ ଆହତ କାରଣରୁ ଅନେକ ଦିନ ଧରି ଭାରତୀୟ ଦଳରୁ ବାହାରେ ରହିଛନ୍ତି । ହେଲେ ଏବେ ହାର୍ଦ୍ଦିକ ଆଇପିଏଲ ଖେଳିବାକୁ ପୁରା ପ୍ରସ୍ତୁତ । ପାଣ୍ଡ୍ୟା କହିଛନ୍ତି ଯେ ସେ ପୁରା ଫିଟ୍ ଅଛନ୍ତି । କିଛି କାରଣବଶତଃ ଭାରତୀୟ ଦଳରେ ଖେଳୁନାହାଁନ୍ତି । ହାର୍ଦ୍ଦିକ ପାଣ୍ଡ୍ୟା କହିଛନ୍ତି ‘ବିଶ୍ୱକପ ସମୟରେ ମୁଁ ବୋଲିଂ କରିବା ବେଳେ ଆହତ ହୋଇଥିଲି । ଏହା ଅତ୍ୟନ୍ତ ଯନ୍ତ୍ରଣାଦାୟକ ନଥିଲା, ପୂର୍ବ ଆଘାତ ଭଳି ମଧ୍ୟ ନଥିଲା, ମୋର ଫିଟନେସ୍ ଉପରେ ମଧ୍ୟ କୌଣସି ପ୍ରଭାବ ପଡିନଥିଲା । ଯେତେବେଳେ ମୁଁ ଫିଟ୍ ହେଉଥିଲି ସେହି ସମୟରେ ଜାନୁଆରୀରେ ଆଫଗାନିସ୍ତାନ ବିପକ୍ଷରେ ଟି-୨୦ ସିରିଜ ହେଉଥିଲା । ସମ୍ପୂର୍ଣ୍ଣ ଫିଟ୍ ହେବା ପରେ ଭାରତୀୟ ଦଳର କୌଣସି ମ୍ୟାଚ ନଥିଲା’ । ଏହି କାରଣରୁ ମୁଁ ମ୍ୟାଚ ଖେଳିପାରିଲି ନାହିଁ ।
ଆଇପିଏଲରେ ହାର୍ଦ୍ଦିକ ପାଣ୍ଡ୍ୟାଙ୍କ ପ୍ରଦର୍ଶନ ଚମକ୍ରାର ରହିଥାଏ । ସେ ଗତ ୨ବର୍ଷ ହେଲା ଗୁଜୁରାଟ ଟାଇଟନ୍ସର କ୍ୟାପଟେନ ଥିବା ବେଳେ ଦଳକୁ ଶିର୍ଷରେ ପହଂଚାଇଥିଲେ । ୨୦୨୨ ପ୍ରଥମ କରି ଗୁଜୁରାଟ ଟାଇଟନ୍ସ ଆଇପିଏଲ ଖେଳିବା ସହ ଚାମ୍ପିଅନ୍ ହୋଇଥିଲେ ଏବଂ ୨୦୨୩ ମସିହାରେ ସେ ଦଳକୁ ଫାଇନାଲକୁ ନେଇଥିଲେ । ଫାଇନାଲରେ ଚେନ୍ନାଇ ସୁପର କିଙ୍ଗ୍ସ ଗୁଜୁରାଟକୁ ପରାସ୍ତ କରିଥିଲା । ଚଳିତ ବର୍ଷ ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ଟିମରେ ଅଧିନାୟକ ଭାବେ ନଜର ଆସିବେ ।
Comments are closed.