ହରଭଙ୍ଗା- ବୌଦ୍ଧଜିଲ୍ଲା ହରଭଙ୍ଗା ଥାନା ଅଂଚଳରେ ଗତ ମଙ୍ଗଳବାର ବିଳମ୍ବିତ ରାତ୍ରୀରେ କାଳବୈଶାଖୀ ପ୍ରଭାବରେ ବିଭିନ୍ନ ସ୍ଥାନରେ ଘରଦ୍ୱାର ଭାଙ୍ଗିବା ସହିତ ଗଛପଡି ବ୍ୟାପକ କ୍ଷୟକ୍ଷତି ଘଟିଛି ।ସୂଚନା ଅନୁସାରେ ହରଭଙ୍ଗା ପଂଚାୟତ ଅର୍ନ୍ତଗତ ଡିଆଁଘାଟ ଗ୍ରାମରେ କାଳବୈଶାଖୀ ପ୍ରଭାବରେ ଅନେକ ବ୍ୟବସାୟ ପ୍ରତିଷ୍ଠାନ କ୍ଷତିଗ୍ରସ୍ତ ହୋଇଛି । ଏକ କୁକୁଡା ଫାର୍ମ ଚୁରମାର ହୋଇଥିବା ଜଣାପଡିଛି ।
ପ୍ରକାଶ ଯେ ପଶୁପାଳନ ବିଭାଗ ପକ୍ଷରୁ ଡିପଲିଟର ପଦ୍ଧତିରେ ଦୁଇ ହଜାର କ୍ଷମତା ବିଶିଷ୍ଟ ଏକ କୁକୁଡା ଫାର୍ମ ପାଇଁ ଡିଆଁଘାଟ ଗ୍ରାମର ମା ଗ୍ରାମପତି ମହିଳା ସ୍ୱୟଂସହାୟକ ଗୋଷ୍ଠୀଙ୍କୁ ଆର୍ଥିକ ସହାୟତା ଯୋଗାଇଦିଆଯାଇଥିଲା । ମିଶନ ଶକ୍ତି ମହିଳାଙ୍କ ଦ୍ୱାରା ନିର୍ମାଣ ହୋଇଥିବା ୨ହଜାର କ୍ଷମତା ବିଶିଷ୍ଟ ଆଜବେଷ୍ଟସ ଛପର କୁକୁଡା ଫାର୍ମ ଘର ଗତ କାଲି ରାତିରେ ଘଟିଥିବା କାଳବୈଶାଖି ପ୍ରଭାବରେ ସମ୍ପୂର୍ଣ୍ଣ ଚୁରମାର ହୋଇଯାଇଛି ।ଏହାକୁ ନେଇ ଋଣଗ୍ରସ୍ତ ସ୍ୱୟଂସହାୟକ ମହିଳା ଚିନ୍ତାରେ ଭାଙ୍ଗିପଡିଛନ୍ତି ।ତୁରନ୍ତ ସେମାନଙ୍କୁ ବୀମାରାଶୀ ସହିତ କ୍ଷତିପୂରଣ ରାଶି ପ୍ରଦାନ ପାଇଁ ସେମାନେ ଦାବି କରିଛନ୍ତି । ହରଭଙ୍ଗା ମେଡିକାଲ ସାହି ହରିଜନ ବସ୍ତିରେ ଗଛପଡି ବିଦ୍ୟୁତ୍ ତାର ଛିଣ୍ଡିପଡିବା ଯୋଗୁଁ ବିଦ୍ୟୁତ୍ ସରବରାହ ବ୍ୟାଘତ ସୃଷ୍ଟି ହୋଇଛି ।ତୁରନ୍ତ ରାଜସ୍ୱ ବିଭାଗ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେବାକୁ ଦାବି ହେଉଛି ।
