ହରଭଙ୍ଗା: ସରକାରଙ୍କ ସବୁ ବିକାଶ ଯୋଜନା ପରେ ବି ଗାଁ ମାଟି ରାସ୍ତାର ଚିତ୍ର ବଦଳୁ ନାହିଁ। ବର୍ଷା ଦିନେ ଗାଁ ରାସ୍ତାର ଏଭଳି ଅବସ୍ଥା ସରକାରଙ୍କ ‘ଆମ ଗାଁ ଆମ ବିକାଶ’ ଯୋଜନାର ଅସଲ ଚେହେରା ପଦାରେ ପକାଇଛି। ଏଭଳି ଏକ ଲଜ୍ଜାଜନକ ଚିତ୍ର ଗତ ସୋମବାର ରାତିରେ ବୌଦ୍ଧଜିଲ୍ଲା ହରଭଙ୍ଗା ବ୍ଲକ ରାମଗଡ ପଂଚାୟତର କୋଇଲିସୂତା ଗ୍ରାମରେ ଦେଖିବାକୁ ମିଳିଛି।
ଗାଁ ରାସ୍ତା ଖରାପ କାରଣରୁ ଆମ୍ବୁଲାନ୍ସଟି ଘର ପାଖରେ ପଂହଚି ପାରିନଥିଲା। ଯାହା ଫଳରେ ଜଣେ ଆସନ୍ନ ପ୍ରସବା ମହିଳାଙ୍କୁ ମେଡିକାଲ ନେବାରେ ବିଳମ୍ବ ଘଟିଥିଲା ବୋଲି ଅଭିଯୋଗ ଉଠିଛି। ଶେଷରେ ଆମ୍ବୁଲାନ୍ସରେ ମହିଳା ନବଜାତକକୁ ଜନ୍ମଦେବା ପରେ ଶିଶୁଟିର ମୃତ୍ୟୂ ଘଟିଥିବା ଭଳି ଏକ ଅଭାବନୀୟ ଚିତ୍ର ଦେଖିବାକୁ ମିଳିଛି।
ସୂଚନା ଅନୁସାରେ କୋଇଲିସୂତା ଗ୍ରାମର ସୋନୁ ସନ୍ତୋଷ ଗିରିଙ୍କ ଆସନ୍ନ ପ୍ରସବ ପନ୍ତ୍ରୀଙ୍କୁ ମେଡିକାଲ ନେବାପାଇଁ ଗତ ସୋମବାର ବିଳମ୍ବିତ ରାତ୍ରିରେ ଆମ୍ବୁଲାନ୍ସ ଡକାଇଥିଲେ। ଗାଁ ରାସ୍ତା ଖରାପ ଯୋଗୁଁ ଆମ୍ବୁଲାନ୍ସଟି ଘର ପାଖରେ ପଂହଚି ପାରିନଥିଲା। ଫଳରେ ଏକ ଅଟୋ ଯୋଗାଡ କରି ମହିଳାଙ୍କୁ ଆମ୍ବୁଲାନ୍ସ ପର୍ଯ୍ୟନ୍ତ ଅଣାଯାଇଥିଲା। ମାତ୍ର ସେତେବେଳକୁ ୨ଘଂଟା ବିଳମ୍ବ ଘଟିଥିଲା। ଯାହା ଫଳରେ ମହିଳାଙ୍କୁ ମେଡିକାଲ ପଂହଚାଇବାରେ ବିଳମ୍ବ ହୋଇଥିଲା। ଶେଷରେ ମେଡିକାଲ ନେବା ରାସ୍ତାରେ ହିଁ ମହିଳାଜଣଙ୍କ ଆମ୍ବୁଲାନ୍ସରେ ଏକ ନବଜାତ ଶିଶୁକୁ ଜନ୍ମ ଦେଇଥିଲେ। ମେଡିକାଲ ପଂହଚିଲା ବେଳକୁ ନବଜାତ ଶିଶୁଟିର ମୃତ୍ୟୂ ଘଟିଥିଲା। ଏଭଳି ଘଟଣା ସୋନୁ ସନ୍ତୋଷଙ୍କ ପରିବାରକୁ ମର୍ମାହତ କରିଛି।
ରାସ୍ତା ଖରାପ କାରଣରୁ ଡାକ୍ତରଖାନା ପଂହଚିବାରେ ବିଳମ୍ବ ଯୋଗୁଁ ଏଭଳି ଘଟଣା ଘଟିଲା ବୋଲି ପରିବାର ପକ୍ଷରୁ ଅଭିଯୋଗ ହୋଇଛି। ଏହି ଘଟଣା ଜଣାପଡିବା ପରେ ବୁଧୁବାର ଅପରାହ୍ନ ୫ଟାବେଳେ ହରଭଙ୍ଗା ବିଡିଓ ନୀଳକ୍ଣ୍ଠ ବେହେରା ଏବଂ ଯନ୍ତ୍ରୀ ଦେବାଶିଷ ନାୟକ ଘଟଣାସ୍ଥଳରେ ପଂହଚି ରାସ୍ତା ଅବସ୍ଥା ଅନୁଧ୍ୟାନ କରିଛନ୍ତି। ରାସ୍ତା ଠିକ ଥିବା ବିଡିଓ କହିଛନ୍ତି। ମାତ୍ର ଆମ୍ବୁଲାନ୍ସ ଡ୍ରାଇଭର କାହିଁକି ନେବାରେ ବିଳମ୍ବ କଲା ସେକଥା ଜଣା ପଡିନାହିଁ। ଅନ୍ୟପଟେ ସ୍ଥାନୀୟ ସଂରପଚ ନରେଶ କୁମାର ସେଠୀ ରାସ୍ତା ଖରାପ କଥାକୁ ଅସ୍ୱୀକାର କରିବା ସହିତ ଆମ୍ବୁଲାନ୍ସ ଡ୍ରାଇଭରର ଅବହେଳା ବୋଲି ଓଲଟା ଅଭିଯୋଗ ଆଣିଛନ୍ତି। ଏଭଳି ଘଟଣା ଉପରେ ପଙ୍ଖାନୁପଙ୍ଖ ତଦନ୍ତ କରାଯିବାକୁ ଦାବୀ ହେଉଛି।
