ହରଭଙ୍ଗା: ଗତ ଅଗଷ୍ଟ ୧୨ତାରିଖ ହରଭଙ୍ଗା ବ୍ଲକର ବି.ଡି.ଓ ସ୍ମିତା ରଥଙ୍କୁ ସ୍ୱତନ୍ତ୍ର ପ୍ରମାଣପତ୍ର ଅଧିକାରୀ(ସ୍ପେଶିଆଲ ସାର୍ଟିଫିକେଟ ଅଫିସର) ଭାବେ ଭୁବନେଶ୍ୱର ଉପ ଜିଲ୍ଲାପାଳ କାର୍ଯ୍ୟାଳୟକୁ ବଦଳି କରାଯାଇଛି । ୟା ଭିତରେ ବି.ଡି.ଓଙ୍କ ବଦଳି ନିର୍ଦ୍ଦେଶକୁ ୧୧ଦିନ ପୂରିସାରିଲାଣି । ମାତ୍ର ବି.ଡି.ଓଙ୍କୁ ରିଲିଫ କରାଯାଉନଥିବାରୁ ହରଭଙ୍ଗାର ନୂତନ ବି.ଡି.ଓ ଭାବେ ଦାୟିତ୍ୱ ମିଳିଥିବା କନ୍ଧମାଳ ଜିଲ୍ଲା ଖଜୁରୀପଡା ବ୍ଲକର ବି.ଡି.ଓ ରବୀନ୍ଦ୍ରନାଥ କହଁରଙ୍କ ଯୋଗଦାନରେ ବିଳମ୍ବ ଘଟୁଛି । ପୁରୁଣା ବି.ଡି.ଓଙ୍କ କାର୍ଯ୍ୟକାଳ ଶେଷହୋଇ ଆସୁଥିବାରୁ ଦୁର୍ନୀତି ଅନିୟମିତତା ବୃଦ୍ଧି ପାଇବାରେ ଲାଗିଛି । ଏହାର ଫାଇଦା ଦୁର୍ନୀତିଗ୍ରସ୍ତ କର୍ମଚାରୀ ଉଠାଇବାରେ ସମର୍ଥ ହେଉଛନ୍ତି ।
ପ୍ରକାଶ ଥାଉ କି ଗତ ୧ ନଭେମ୍ବରରେ ଶ୍ରୀମତି ରଥ ହରଭଙ୍ଗା ବି.ଡି.ଓ ଭାବେ ଦାୟିତ୍ୱ ଗ୍ରହଣ କରିଥିଲେ । ପୂର୍ବରୁ ଧର୍ମଶାଳା ବି.ଡି.ଓ ଭାବେ କାର୍ଯ୍ୟରତଥିବା ସ୍ମିତା ରଥ ପି.ଡି.ଏସ ଦୁର୍ନୀତିରେ ଛନ୍ଦି ହୋଇ ବୌଦ୍ଧକୁ ପନିସମେଂଟ ଟ୍ରାନସଫରରେ ଡେପୁଟି କଲେକ୍ଟର ଭାବେ ଆସିଥିଲେ । ସେଠାରେ କିଛିଦିନ ରହିବା ପରେ ହରଭଙ୍ଗା ବି.ଡି.ଓ ଦାୟିତ୍ୱ ଗ୍ରହଣ ପରେ ବି କିରିତକର୍ମା ବି.ଡି.ଓଙ୍କ କାର୍ଯ୍ୟ ଶୈଳୀରେ ସୁଧାର ଆସିନଥିଲା । ସହକର୍ମୀମାନଙ୍କୁ ଖରାପ ବ୍ୟବହାର କରୁଥିବା ଅଭିଯୋଗ ଜିଲ୍ଲାପାଳଙ୍କ ପାଖରେ ହୋଇଥିଲା । ଏହା ସହିତ ନିଜ ଏୟାରମାର୍କ କ୍ୱାର୍ଟରରେ ନରହି ଦୀର୍ଘ ୫ମାସ ହେଲା ୩୫କିଲୋମିଟର ଦୂର ବୌଦ୍ଧରୁ ସରକାରୀ ଗାଡିରେ ୪ଥର ଦୈନିକ ୧୪୦ କିଲୋମିଟର ଯିବାଆସିବା କରି ସରକାରୀ ଅର୍ଥର ବ୍ୟାପକ ଅପଚୟ ଘଟଣା ସମାଜ ଜନସାଧାରଣଙ୍କ ସାମନାକୁ ଆଣିଥିଲା । ଖବର ପ୍ରସାରଣ ପରେ ବି.ଡି.ଓ ସରକାରୀ କ୍ୱାର୍ଟରକୁ ଫେରିଥିଲେ ।
ମାତ୍ର ଦୀର୍ଘ ୫ମାସ ଧରି ସରକାରୀ ଗାଡିର ଅପବ୍ୟବହାର କରି ଦୈନିକ ୧୪ଶହ ଟଙ୍କା ଖର୍ଚ୍ଚ ହିସାବରେ ମାସିକ ୪୨ହଜାର ଟଙ୍କା ହିସାବରେ ୫ମାସର ୨ଲକ୍ଷ ୧୦ହଜାର ଟଙ୍କାର ସରକାରୀ ଅର୍ଥ ଭରଣା ହୋଇପାରିନାହିଁ । ଏହି ଅର୍ଥ ବି.ଡି.ଓଙ୍କ ଦରମାରୁ ଭରଣା ପାଇଁ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ଉଠୁଛି । ନିକଟରେ ହୋଇଥିବା ପଞ୍ଚାୟତ ପି.ଇ.ଓଙ୍କ ବଦଳି ଅନିୟମିତତା ମଧ୍ୟ ସାମନାକୁ ଆସିଥିଲା । ତାହା ସହିତ ବକେୟା ପୁରୁଣା ବନ୍ୟା ବିଲ ପଇଠ ସାଙ୍ଗକୁ ନଳକୂପ ଯନ୍ତ୍ରାଂଶ କିଣାରେ ହୋଇଥିବା ଅନିୟମିତତା ବି.ଡି.ଓଙ୍କ ସମୟରେ ହୋଇଥିବା ଆଲୋଚନା ହେଉଛି । ଏସବୁ କାରଣରୁ ବି.ଡି.ଓଙ୍କୁ ତୁରନ୍ତ ରିଲିଫ ପାଇଁ ଦାବି ହେଉଛି ।
