ହରଭଙ୍ଗା: ହରଭଙ୍ଗା ବ୍ଲକ କାର୍ଯ୍ୟାଳୟ ପ୍ରାଙ୍ଗଣରେ ଶନିବାର ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ ହିତାଧିକାରୀ ଚୟନ ପାଇଁ ଏକ ସାମର୍ଥ୍ୟ ପରୀକ୍ଷା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବ୍ଲକର ବିଭିନ୍ନ ପଂଚାୟତର ୧୫୪ଜଣ କଳାକାର ହିତାଧିକାରୀ ପଞିକୃତ ହୋଇଥିଲେ। ସେଥିରୁ ୧୨୨ଜଣ କଳାକାର ନିଜର କଳା ସାମର୍ଥ୍ୟ ବିଚାରପତିଙ୍କ ସମ୍ମୁଖରେ ପ୍ରଦର୍ଶନ କରିଥିଲେ। ଆଉ ୩୨ଜଣ କଳାକାର ସାମର୍ଥ୍ୟ ପରୀକ୍ଷା କାର୍ଯ୍ୟକ୍ରମରେ ଅନୁପସ୍ଥିତ ଥିବା ସୂଚନା ମିଳିଛି।
ସୂଚନା ଥାଉ କି ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନାରେ ସାମର୍ଥ୍ୟ ପରୀକ୍ଷାରେ କୃତକାର୍ଯ୍ୟ ହୋଇଥିବା ହିତାଧିକାରୀଙ୍କୁ ମାସିକ ୧୨ଶହ ଟଙ୍କା ପ୍ରଦାନ ପାଇଁ ବ୍ୟବସ୍ଥା କରାଯାଇଛି। ଏହି ସାମର୍ଥ୍ୟ ପରୀକ୍ଷା କାର୍ଯ୍ୟକ୍ରମରେ ବ୍ଲକର ବିଭିନ୍ନ କୋଣଅନୁକୋଣରୁ ନିଜର ପ୍ରତିଭା ପ୍ରଦର୍ଶନ ସମୟରେ ଅସମ୍ଭବ ଭିଡ ସାଙ୍ଗକୁ ଢୋଲ, ବାଜା, ଗୀତ ନାଚରେ କାର୍ଯ୍ୟାଳୟ ପ୍ରକମ୍ପିତ ହେଉଥିଲା।
