ବଲାଙ୍ଗିର: ବଲାଙ୍ଗିର ଜିଲା କଣ୍ଟାବାଞ୍ଜିରେ ରହୁଥିବା ଭିନ୍ନକ୍ଷମ ବ୍ୟବସାୟୀ ବ୍ୟାଟେରୀ ଚାଳିତ ସାଇକେଲ ପାଇଁ ଜିଲାପ୍ରଶାସନର ଦ୍ୱାରସ୍ଥ ହୋଇଛନ୍ତି। ଭିନ୍ନକ୍ଷମ ହୋଇଥିଲେ ସୁଦ୍ଧା ସେ ନିଜ ପରିବାର ଚଳାଇବା ପାଇଁ ଏକ ଛୋଟ ବ୍ୟବସାୟ ଚଲାଇଛନ୍ତି। ତାଙ୍କ ପାଖରେ ବ୍ୟାଟେରୀ ଚାଳିତ ସାଇକେଲ କିଣିବା ପାଇଁ ଅର୍ଥ ନ ଥିବା ବେଳେ ଜିଲା ପ୍ରଶାସନଙ୍କୁ ସହାୟତା ନିବେଦନ କରିଛନ୍ତି।
ସୂଚନା ଅନୁସାରେ, କଣ୍ଟାବାଞ୍ଜି ମହାନ୍ତିପଡାରେ ରହୁଥିବା ରବୀନ୍ଦ୍ର ମହାନ୍ତି ଜଣେ ଭିନ୍ନକ୍ଷମ ବ୍ୟକ୍ତି। ୧୯୯୬ରେ ହୋଇଥିବା ଏକ ଦୁର୍ଘଟଣାରେ ସେ ନିଜ ଗୋଡ ହରାଇଥିଲେ। ତଥାପି ସେ ହାର ନ ମାନି ପରିବାର ଚଲାଇବା ପାଇଁ ଘରେ ଏକ ଛୋଟ ବ୍ୟବସାୟ ଚଳାଉଛନ୍ତି। ତେବେ ତାଙ୍କ ପାଖରେ ଥିବା ଭିନ୍ନକ୍ଷମ ସାଇକେଲ ନଷ୍ଟ ହୋଇଯାଇଥିବା ବେଳେ ଏକ ନୂଆ ସାଇକେଲ ପାଇଁ ଜିଲା ପ୍ରଶାସନର ସହାୟତା ମାଗିଛନ୍ତି। ତାଙ୍କୁ ଏକ ବ୍ୟାଟେରୀ ଚାଳିତ ସାଇକେଲ ଯୋଗାଇଦେଲେ ସେ ନିଜ ବ୍ୟବସାୟ କରିବାରେ କିଛି ସୁବିଧା ପାଇପାରିବେ ବୋଲି କହିଛନ୍ତି।
