ଗୁଣୁପୁର: ଉଚ୍ଚ ଶିକ୍ଷିତ ଯୁବକଙ୍କ ଅନନ୍ୟ ପ୍ରୟାସ। ନୂଆ କିଛି କରି ରୋଜଗାରକ୍ଷମ ହେବା ଲକ୍ଷ୍ୟରେ ବାଉଁଶ ନଳ ସାହାଯ୍ୟରେ ପ୍ରସ୍ତୁତ କରୁଛନ୍ତି ଭଳି କି ଭଳି ବ୍ୟଞ୍ଜନ ଯାହା ଗ୍ରାହକଙ୍କୁ ବେଶ ଆକୃଷ୍ଟ କରୁଛି। ରାୟଗଡା ଜିଲା ଗୁଣୁପୁର ଶିବଶକ୍ତି ନଗରରେ ତିନି ଜଣ ଉଚ୍ଚ ଶିକ୍ଷିତ ଯୁବକ ଏଭଳି ନିଆରା ଉପାୟରେ ସୁସ୍ୱାଦୁ ବ୍ୟଞ୍ଜନ ପ୍ରସ୍ତୁତ କରି ଅନ ଲାଇନରେ ଗ୍ରାହକଙ୍କୁ ପରସି ଦେଉଛନ୍ତି। ସତ୍ୟଜିତ ମିଶ୍ର ନାମକ ଜଣେ ଯୁବ ସଫ୍ଟୱେର ଇଞ୍ଜିନିୟର କହିଛନ୍ତି, ରାୟଗଡାରେ ବାଉଁଶ ନଳରୁ ପ୍ରସ୍ତୁତ ଖାଦ୍ୟ ସାମଗ୍ରୀ ମିଳେନାହିଁ। ଏଭଳି ଖାଦ୍ୟ ବାହାରେ ଖାଇବାକୁ ମିଳେ। ଆମ ଅଞ୍ଚଳରେ ମଧ୍ୟ ଏଭଳି ସୁସ୍ୱାଦୁ ବ୍ୟଞ୍ଜନ ପ୍ରସ୍ତୁତ କରି ଗ୍ରାହକଙ୍କୁ ଭେଟି ଦେବା ପାଇଁ ତାଙ୍କର ଇଚ୍ଛା ହେଲା। ଏହାଛଡା ବାଉଁଶର ଚାହିଦା, ବ୍ୟବସାୟ ମଧ୍ୟ ଧୀରେ ଧୀରେ ବଢିବ। ତେଣୁ ସ୍ଥାନୀୟ ଅଞ୍ଚଳରେ ଏଭଳି ପ୍ରୟାସ କରାଯାଇଛି।
ପ୍ରଥମେ ସଂଗୃହୀତ ବାଉଁଶ ନଳକୁ ଭଲ ଭାବରେ ପରିଷ୍କାର କରି ସେଥିରେ ପୂର୍ବ ପ୍ରସ୍ତୁତ ମାଛ ହେଉ ଅବା ଚିକେନ୍, ମଟନ ସର୍ଗି ପତ୍ର କିମ୍ବା କଦଳୀ ପତ୍ରରେ ଆବଦ୍ଧ କରି ବାଉଁଶ ନଳରେ ଭର୍ତ୍ତି କରାଯାଏ। ଏହା ପରେ ଚୁଲୀ ଉପରେ ବାଉଁଶ ନଳକୁ ପ୍ରାୟ ୧ ଘଣ୍ଟା ପର୍ଯ୍ୟନ୍ତ ରଖାଯାଏ। ସୀମାଦ୍ରୀ କ୍ରିଷ୍ଣା ନାମକ ଜଣେ ବିଇଡି ତାଲିମଧାରୀ ଯୁବକ କହିଛନ୍ତି ଯେ ବର୍ତ୍ତମାନ ଗ୍ରାହକଙ୍କ ଅର୍ଡର ଅନୁଯାୟୀ ମାଛ, ଚିକେନ୍, ବିରିୟାନି ଓ ଛତୁ କରାଯାଉଛି। ପରବର୍ତ୍ତୀ ସମୟରେ ମାଟି ହାଣ୍ଡିରେ ମଧ୍ୟ ଏଭଳି ବ୍ୟଞ୍ଜନ ପ୍ରସ୍ତୁତ କରି ଜିଲ୍ଲାର ବିଭିନ୍ନ ସ୍ଥାନରେ ଦୋକାନ ଖୋଲାଯିବା ଲକ୍ଷ୍ୟ ରହିଛି ବୋଲି କହିଛନ୍ତି। ସ୍ଥାନୀୟ ଅଞ୍ଚଳରେ ଏଭଳି ସୁସ୍ୱାଦୁ ବ୍ୟଞ୍ଜନ ମିଳୁଥିବାରୁ ଗ୍ରାହ ମାନେ ମଧ୍ୟ ବେଶ ଖୁସି । ପୂର୍ବରୁ ବାହାର ରାଜ୍ୟ କିମ୍ବା ନାମୀ ସହରରେ ଏଭଳି ଖାଦ୍ୟ ମିଳୁଥିଲା। ବର୍ତ୍ତମାନ ହାତ ପାହାନ୍ତାରେ ମିଳିବାରୁ ସମସ୍ତେ ଖୁସି।
