ଅହମଦାବାଦ: ଗୁଜରାଟ ବିଧାନସଭା ନିର୍ବାଚନରେ ରାଜ୍ୟବାସୀ ସମସ୍ତ ପୁରୁଣା ରେକର୍ଡ ଭାଙ୍ଗିେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ରବିବାର ଗୁଜରାଟର ଆଦିବାସୀ ବହୁଳ ଅଞ୍ଚଳ କାପରଦାରେ ନିର୍ବାଚନ ପ୍ରଚାର କରି ମୋଦୀ କହିଛନ୍ତି ଯେ ଗୁଜରାଟବାସୀ ପୁନର୍ବାର ବିଜେପିକୁ ନିର୍ବାଚିତ କରିବାକୁ ମନସ୍ଥ କରିସାରିଛନ୍ତି। ଏପରିକି ଗୁଜରାଟବାସୀ ସମସ୍ତ ପୁରୁଣା ରେକର୍ଡ ଭାଙ୍ଗି ବିଜେପିକୁ ବିପୁଳ ସଂଖ୍ୟାରେ ନିର୍ବାଚିତ କରିବାକୁ ନିଷ୍ପତ୍ତି ନେଇଛନ୍ତି। ଗୁଜରାଟରେ ବିଜେପି ୨୭ବର୍ଷ ଶାସନ କ୍ଷମତାରେ ରହିଆସିଛି। ଏଥର ପୁନର୍ବାର ବିଜୟୀ ହୋଇ ସର୍ବାଧିକ ସମୟ କ୍ଷମତାରେ ରହିବାର ସମସ୍ତ ପୁରୁଣା ରେକର୍ଡ ଭାଙ୍ଗିବ। ମୋଦୀ କହିଛନ୍ତି ଯେ ଇଂରାଜୀ ବର୍ଣ୍ଣମାଳାର ଶିକ୍ଷା ଯେପରି ‘ଏ’ରୁ ଆରମ୍ଭ ହୋଇଥାଏ ସେହିପରି ଗୁଜରାଟରେ ମୋର ନିର୍ବାଚନ ପ୍ରଚାର ଆଦିବାସୀ ଅଞ୍ଚଳରୁ ଆରମ୍ଭ ହୋଇଛି। ତେଣୁ ମୋ ପାଇଁ ‘ଏ’ ଫର ଆଦିବାସୀ। ଆଦିବାସୀ ଭାଇ ଓ ଭଉଣୀଙ୍କ ଆଶୀର୍ବାଦ ନେଇ ମୋର ନିର୍ବାଚନ ପ୍ରଚାର ଆରମ୍ଭ କରିଛି। ମୋଦୀ କହିଛନ୍ତି ଯେ ଏଥର ଗୁଜରାଟ ନିର୍ବାଚନରେ ବିଜେପି ବିଜୟୀ ହେଲେ ପ୍ରଧାନମନ୍ତ୍ରୀ ଭାବେ ଗୁଜରାଟ ପାଇଁ ସର୍ବାଧିକ ସମୟ ଦେବେ। ସେହିପରି ଗୁଜରାଟରେ ଏଥର ବିଜେପି ସର୍ବାଧିକ ଆସନରେ ବିଜୟୀ ହୋଇ ରେକର୍ଡ କରିବ।
Comments are closed.