ଦାଦନ ଖଟିବାକୁ ଯାଇଥିଲେ; ଶବ ହୋଇ ଫେରିଲେ

ଗୁଡଭେଲା : ପରିବାର ପେଟ ପାଟଣା ପାଇଁ ବାହାର ରାଜ୍ୟକୁ ଦାଦନ ଖଟିବାକୁ ଯାଇ ଶବ ହୋଇ ଫେରିଛନ୍ତି ଦାଦନ ଶ୍ରମିକ । ଏଭଳି ଏକ ଘଟଣା ଦେଖିବାକୁ ମିଳିଛି ବଲାଙ୍ଗିର ଗୁଡଭେଲା ବ୍ଳକ ଅନ୍ତର୍ଗତ ସନ୍ଧିସରା ଗାଁରେ । ମୃତକ ହେଉଛନ୍ତି ଶୁକ୍ରୁ ବାଗଙ୍କ ପୁଅ ରାଜେଶ ବାଗ(୧୯)। ସେ ପ୍ରାୟ ୮ ମାସ ହେବ ପେଟପାଟଣା ପାଇଁ ଗୁଜରାଟ ରାଜ୍ୟର ଭୌଥାନଠାରେ ରହି କୋଠା ନିର୍ମାଣ କାର୍ଯ୍ୟରେ କୁଲି ମଜୁରି କାମ କରୁଥିଲେ । ହେଲେ ସୋମବାର ସନ୍ଧ୍ୟା ସମୟରେ କାମସାରି ଏକ ବିଦ୍ୟୁତ ତାର ରଖିବା ପାଇଁ ଯାଇଥିଲା ସମୟରେ ବିଦ୍ୟୁତ ଆଘାତରେ ତାଙ୍କର ମୃତ୍ୟୁ ଘଟିଥିଲା । ଏହାପରେ ସାଙ୍ଗ ସାଥି ଖବର ଦେବା ପରେ ପରିବାର ଲୋକଙ୍କ ଦ୍ୱାରା ଏକ ଘରୋଇ ଆମ୍ବୁଲାନ୍ସ ଦ୍ବାରା ୫୦ହଜାରରୁ ଉର୍ଦ୍ଧ୍ବ ଟଙ୍କା ଖର୍ଚ୍ଚ କରି ଗାଁକୁ ମୃତଦେହ ଅଣାଗଲା । ହେଲେ ସନ୍ଧିସରା ଗାଁ ମୁଣ୍ଡରୁ ଝାଙ୍କରପଡାକୁ ପ୍ରାୟ ୧.୫ କିମି ହେବ ରାସ୍ତା ଲଗାଣ ବର୍ଷାରେ କାଦୁଅ ଯୋଗୁ ଶବବୁହା ଗାଡିଟି ଯାଇ ପାରିନଥିଲା । ଯାହା ଫଳରେ ପରିବାର ଲୋକଙ୍କ ସହଯୋଗରେ ଏକ ଖଟିଆରେ ଶବକୁ ବୁହା ହୋଇ ଘରରକୁ ନିଆଯାଇଥିଲା ।

ଅପରପକ୍ଷରେ ରାଜେଶଙ୍କ ବାପା ଜଣେ କୁଲି ମଜୁରିଆ ହୋଇଥିବା ବେଳେ ତାଙ୍କର ୨ଟି ବଢିଲା ଝିଅ ଅଛନ୍ତି । ଏହିପରି ସମୟରେ ଏକ ମାତ୍ର ରୋଜଗାରିଆ ପୁଅକୁ ହରାଇଥିବାରୁ ପରିବାର ମଧ୍ୟରେ ଶୋକାକୂଳ ପରିସ୍ଥିତି ସୃଷ୍ଟି ହୋଇଛି । ତେଣୁ ସରକାର ନିୟମ ଅନୁସାରେ ସହାୟତା ଯୋଗାଇ ଦେବାକୁ ଦାବି ହେଉଛି ।