ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଟେଳାପାଲି ନିକଟରେ ଏକ ସରକାରୀ ବସ ଡ୍ରାଇଭରଙ୍କୁ ଅନ୍ୟ ଏକ ଘରୋଇ ବସ ଡ୍ରାଇଭର ଓ କଣ୍ଡକ୍ଟର ମାଡ ମାରିଥିବା ଅଭିଯୋଗ ହୋଇଛି। ଉଭୟ ସରକାରୀ ବସ ଓ ଘରୋଇ ବସ କର୍ମଚାରୀଙ୍କ ତରଫରୁ ଫିରିଙ୍ଗିଆ ଥାନାରେ ପୃଥକ ଅଭିଯୋଗ କରାଯାଇଛି। ପୁଲିସ ଏ ନେଇ ଦୁଇଟି ମାମଲା ରୁଜୁ କରି ତଦନ୍ତ ଜାରିରଖିଛି।
ସୂଚନା ଅନୁସାରେ, ଓଭର ଟେକ କରିବାକୁ ନେଇ ଏହି ଗଣ୍ଡଗୋଳ ହୋଇଥିଲା। ବୁଧବାର ଫୁଲବାଣୀଠାରୁ ଅଣ୍ଡାସରୁ ଯାଉଥିବା ଏକ ସରକାରୀ ବସ ଓ ଫୁଲବାଣୀଠାରୁ ସାଡୀଙ୍ଗିଆ ଯାଉଥିବା ଏକ ଘରୋଇ ବସର ଡ୍ରାଇଭର ଓ କଣ୍ଡକ୍ଟର ଫୁଲବାଣୀ ଫିରିଙ୍ଗିଆ ମୁଖ୍ୟ ରାସ୍ତାର ଟେଲାପାଲି ନିକଟରେ ହଠାତ ସରକାରୀ ବସକୁ ଅଟକାଇ ଡ୍ରାଇଭରଙ୍କୁ ଏକ ଲୁହରଡ଼ରେ ଅତର୍କିତ ଆକ୍ରମଣ କରିଥିଲେ। ଏହାକୁ ନେଇ ବସର ଡ୍ରାଇଭର ଦିଲୀପ କୁମାର ବେହେରା ଫିରିଙ୍ଗିଆ ଥାନାରେ ଲିଖିତ ଅଭିଯୋଗ କରିଥିବା ବେଳେ ଘରୋଇ ବସର କଣ୍ଡକ୍ଟର ଓ ଡ୍ରାଇଭର ମଧ୍ୟ ସରକାରୀ ବସ ଡ୍ରାଇଭର ଓ ଅନ୍ୟ କର୍ମଚାରୀଙ୍କ ନାରେ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ଥାନା ଅଧିକାରୀ ଗୋପୀନାଥ ପ୍ରଧାନଙ୍କ ନିର୍ଦେଶ କ୍ରମେ ଉଭୟଙ୍କ ଅଭିଯୋଗକୁ ଗ୍ରହଣ କରି ଫିରିଙ୍ଗିଆ ଥାନାରେ ୧୦୧ ଓ ୧୦୨ ରେ ଦୁଇଟି ମାମଲା ରୁଜୁ କରାଯାଇ ତଦନ୍ତ ଜାରି ରହିଥିବା ଏଏସଏଇ କୃଷ୍ଣଚନ୍ଦ୍ର ଗୌଡ଼ କହିଛନ୍ତି।
