ପିପିଲି: ଅଗ୍ରଣୀ ନାଗରିକ ସଂଗଠନ ଜନସ୍ୱାର୍ଥ ସୁରକ୍ଷା ସମିତି ପକ୍ଷରୁ ଦାଣ୍ଡମୁକୁନ୍ଦପୁରଠାରେ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ୯୩ତମ ଶ୍ରାଦେ୍ଧାତ୍ସବ ଶୁକ୍ରବାର ନିରାଡମ୍ବର ଭାବରେ କୋଭିଡ୍-୧୯ ମାର୍ଗଦର୍ଶିକା ଅନୁପାଳନ ପୂର୍ବକ ପାଳିତ ହୋଇଯାଇଛି । ଗୋପବନ୍ଧୁଙ୍କ ଦ୍ୱାରା ପ୍ରତିଷ୍ଠିତ ଗୋପବନ୍ଧୁ ମେମୋରିଆଲ ହାଇସ୍କୁଲ ପରିସରରେ ଥିବା ତାଙ୍କ ପ୍ରତିମୂର୍ତ୍ତୀରେ ପ୍ରତ୍ୟୁଷରେ ମାଲ୍ୟାର୍ପଣ କରାଯାଇଥିଲା । ଏହି ଅବସରରେ ସମିତିର ମୁଖ୍ୟ ସଂଯୋଜକ ଶିକ୍ଷାବିତ୍ ସନ୍ତୋଷ କୁମାର ମିଶ୍ର ଗୋପବନ୍ଧୁଙ୍କ ସଂକ୍ଷିପ୍ତ ଜୀବନୀ ଉପରେ ଆଲୋକପାତ କରିବା ସହ ତାଙ୍କ ଆଦର୍ଶରେ ଅନୁପ୍ରାଣିତ ହେବାକୁ ସମସ୍ତଙ୍କୁ ପରାମର୍ଶ ଦେଇଥିଲେ । ଶିକ୍ଷାବିତ୍ ପ୍ରସନ୍ନ କୁମାର ଦାସ ଗୋପବନ୍ଧୁଙ୍କ କବିତା ଆବୃତ୍ତି କରିଥିବା ବେଳେ ଅଭିଷେକ ଲେଙ୍କା, ପ୍ରଭାତ ବେହେରା, ରଣଜିତ ପଣ୍ଡା, ଚିତ୍ତରଞ୍ଜନ ସାହୁ, କାଳୁ ଚରଣ ଭୋଇ ପ୍ରମୁଖ ଗୋପବନ୍ଧୁଙ୍କ ସୃତିଚାରଣ କରିଥିଲେ। ଗୋପବନ୍ଧୁଙ୍କ ଦ୍ୱାରା ରଚିତ କବିତା ଗୁଡିକୁ କଣ୍ଠଶିଳ୍ପୀଙ୍କ ଦ୍ୱାରା ରେକଡିଂ କରାଇ ପ୍ରଚାର ଓ ପ୍ରସାର କରିବା, ସତ୍ୟବାଦୀ ବନବିଦ୍ୟାଳୟ ଉପରେ ଗବେଷଣା କରିବା ଓ ସୁଆଣ୍ଡୋ ସ୍ଥିତ ଗୋପବନ୍ଧୁଙ୍କ ବାସଗୃହକୁ ତୀର୍ଥକ୍ଷେତ୍ରରେ ପରିଣତ କରାଇବା ପାଇଁ ସମିତି ପକ୍ଷରୁ ରାଜ୍ୟ ସରକାରଙ୍କ ନିକଟରେ ଦାବି କରାଯାଇଥିଲା। ଏହି ଅବସରରେ ରାମଚଣ୍ଡି ପ୍ରଭାତ ଶାଖାର ସ୍ୱୟଂସେବକଙ୍କ ଦ୍ୱାରା ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
Comments are closed.