ଅମେଠି : ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦ ପରଠାରୁ ପାକିସ୍ତାନ ଦ୍ୱାରା ଭାରତ ବିରୋଧରେ ଚଲାଯାଇଥିବା ଦୁଷ୍ପ୍ରଚାର ମଧ୍ୟରେ ଗୁରୁବାର ଭାରତୀୟ ସେନା ମୁଖ୍ୟ ଜେନେରାଲ ବିପିନ ରାୱତ ଏକ ବଡ଼ ବୟାନ ଦେଇଛନ୍ତି। ଜେନେରାଲ ବିପିନ ରାୱତ କହିଛନ୍ତି ଯେ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ କୌଣସି ବି କାର୍ଯ୍ୟାନୁଷ୍ଠାନ ପାଇଁ ଭାରତୀୟ ସେନା ସମ୍ପୂର୍ଣ୍ଣ ପ୍ରସ୍ତୁତ ରହିଛି। ସରକାରଙ୍କ ନର୍ଦେଶ ମିଳିବା ମାତ୍ରେ ଅଭିଯାନ ଆରମ୍ଭ କରିବୁ।
ଏହା ପୂର୍ବରୁ କେନ୍ଦ୍ର ରାଷ୍ଟ୍ର ମନ୍ତ୍ରୀ ଜିତେନ୍ଦ୍ର ସିଂହ ପିଓକେକୁ ଭାରତରେ ମିଶାଯିବ ବୋଲି କହିଥିଲେ। ଏନେଇ ପ୍ରଶ୍ନ କରାଯିବାରୁ ଜେନେରାଲ ବିପିନ ରାୱତ କହିଛନ୍ତି ଯେ ସରକାରଙ୍କୁ ଏନେଇ ନିଷ୍ପତ୍ତି ନେବାକୁ ପଡ଼ିବ। ପିଓକେରେ କୌଣସି ପ୍ରକାରର ଅଭିଯାନ ପାଇଁ ସେନା ପ୍ରସ୍ତୁତ ରହିଛି। ସରକାର ନିର୍ଦେଶ ଦେଲେ ସେନା କାର୍ଯ୍ୟାନୁଷ୍ଠାନକୁ ରୂପ ଦେବ ଓ ଏଥିପାଇଁ ପ୍ରସ୍ତୁତ ଅଛି। ସେହିପରି ପୂର୍ବରୁ କେନ୍ଦ୍ର ଗୃହ ମନ୍ତ୍ରୀ ରାଜନାଥ ସିଂହ ପିଓକେକୁ ନେଇ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଚେତାବନୀ ଦେଇଥିଲେ। ଏବେ କଥାବାର୍ତ୍ତା କେବଳ ପିଓକେକୁ ନେଇ ହେବ ବୋଲି ରାଜନାଥ କହିଥିଲେ। ଏସବୁରୁ ସରକାର ଏବେ ପିଓକେ ଉପରେ କୌଣସି ଏକ ବଡ଼ ନିଷ୍ପତ୍ତି ନେଇପାରନ୍ତି ବୋଲି ଚର୍ଚ୍ଚା ହେଉଛି।
