ପିପିଲି :ଆମ୍ବେଦକର ଲୋହିଆ ବିଚାରମଞ୍ଚ, ପୁରୀ ଶାଖା ପକ୍ଷରୁ ପିପିଲି ବ୍ଲକ ଅନ୍ତର୍ଗତ ଭାରତୀପୁର ଗ୍ରାମପଞ୍ଚାୟତ କଲ୍ୟାଣମଣ୍ଡପ ଠାରେ ସୋମବାର ଦିନ ଗୌତମ ବୁଦ୍ଧଙ୍କ ଜୟନ୍ତୀ ପାଳିତ ହୋଇଯାଇଛି। ଏହି ଅବସରରେ ଆୟୋଜିତ ଆଲୋଚନାଚକ୍ରରେ ଅତିଥି ଭାବେ ଶିକ୍ଷାବିତ୍ ଓ ସମାଜସେବୀ ଘାସିରାମ ପଣ୍ଡା, ଆମ୍ବେଦକର ଲୋହିଆ ବିଚାରମଞ୍ଚର ରାଜ୍ୟ ସଭାପତି ସଂଗ୍ରାମ ମଲ୍ଲିକ, ବେରବୋଇ ସ୍ଥିତ କସ୍ତୁରବା ଟ୍ରଷ୍ଟର ସଂଚାଳିକା କବିତାରାଣୀ ପରିଡା ଏବଂ ସାମାଜିକ କର୍ମୀ କିଷାନ ପଟ୍ଟନାୟକ ପ୍ରମୁଖ ଯୋଗଦେଇ ଗୌତମ ବୁଦ୍ଧଙ୍କ ଜୀବନୀ, ଆଦର୍ଶ ଓ ଆଜିର ସାଂପ୍ରତିକ ପରିସ୍ଥିତିରେ ଗୌତମ ବୁଦ୍ଧଙ୍କ ଶାନ୍ତି, ପ୍ରେମ, ଅହିଂସା ଓ ସମାନତାର ଯଥାର୍ଥତା ଉପରେ ଆଲୋକପାତ କରିଥିଲେ।
ଏହି ଅବସରରେ କୁନି କୁନି ଶିଶୁ କଳାକାରଙ୍କ ନାଟକ ପରିବେଷଣ କରାଯାଇଥିଲା। ଆମ୍ବେଦକର ଲୋହିଆ ବିଚାରମଞ୍ଚ, ପୁରୀ ଶାଖା ସଭ୍ୟ ଅକ୍ଷୟ ବେହେରା ମଞ୍ଚ ପରିଚାଳନା କରିଥିବା ବେଳେ ସାମାଜିକ କର୍ମୀ ରମାକାନ୍ତ ବେହେରା ଶେଷରେ ଧନ୍ୟବାଦ ଅର୍ପଣ କରିଥିଲେ। ସମସ୍ତ କାର୍ଯ୍ୟକ୍ରମ ପରିଚାଳନାରେ ଅନୁଷ୍ଠାନର ଗୋବିନ୍ଦ ବେହେରା, ପ୍ରଦୀପ ନାୟକ, ନାରାୟଣ ବେହେରା, ପ୍ରକାଶ ବେହେରା ପ୍ରମୁଖ ସହଯୋଗ କରିଥିଲେ।
