ଗୁଣୁପୁର: ଦିନ କେଇଟା ପରେ ଅଗ୍ରପୂଜ୍ୟ ବିଘ୍ନ ବିନାଶକ ଗଣେଶଙ୍କ ପୂଜା । ଏଥିପାଇଁ ସବୁଠି ଉତ୍ସାହ ଓ ଉଦ୍ଦୀପନା । ପ୍ରତି ସାହି,ଗଳିକନ୍ଦି,ପୂଜା ମଣ୍ଡପ ଠୁ ଆରମ୍ଭ କରି ଶିକ୍ଷାନୁଷ୍ଠାନ ପର୍ୟ୍ୟନ୍ତ ପୂଜା ପାଇଁ ଚଳଚଞ୍ଚଳ । ଏଇଥିପାଇଁ ଗୁଣୁପୁର ବଜାରରେ ଏବେ ଭଳିକି ଭଳି ଗଣେଶଙ୍କ ମୂର୍ତ୍ତି ର ସମ୍ଭାର ଦେଖିବାକୁ ମିଳିଛି । ବେଶ ଦୁଇ ପଇସା ରୋଜଗାର ଆଶାରେ ପଡୋଶୀ ଆନ୍ଧ୍ରରୁ ଲକ୍ଷ ଲକ୍ଷ ଟଙ୍କା ବ୍ୟୟରେ ହରେକ ରକମର ମୂର୍ତ୍ତି ସବୁ ଆଣିଛନ୍ତି ବ୍ୟବସାୟୀ । ହେଲେ ସରକାରଙ୍କ କଟକଣା ସମସ୍ତ ଉତ୍ସାହକୁ ପାଣିଚିଆ କରି ଦେଇଛି । ଏଥିପାଇଁ ଉଭୟ ଭକ୍ତ ଓ ବ୍ୟବସାୟୀ ଏବେ ନିରାଶ ।
ସରକାରଙ୍କ କଟକଣା ଅନୁଯାୟୀ ପୂଜା ମଣ୍ଡପ ତିନି ଆଡୁ ବନ୍ଦ ରହିବା ସହ ମୂର୍ତ୍ତି ର ଉଚ୍ଚତା ୪ ଫୁଟ ରୁ ଅଧିକ ହେବନାହିଁ । ଏହାକୁ ସହଜରେ ଗ୍ରହଣ କରି ପାରୁନାହାନ୍ତି ଭକ୍ତ ଓ ବ୍ୟବସାୟୀ । କରୋନା ସହ ମୂର୍ତ୍ତୀ ର ଉଚ୍ଚତା ସହ କଣ ସମ୍ପର୍କ ରହିଛି ବୋଲି ପ୍ରଶ୍ନ ଉଠିଛି । ତେଣୁ ସରକାର ଭକ୍ତଙ୍କ ଧର୍ମୀୟ ଭାବନା କୁ ଗୁରୁତର ସହ ବିଚାର କରି ପୂଜା ପାର୍ବଣ କୁ ଅନୁମତି ଦେବାକୁ ସାଧାରଣରେ ଦାବୀ ହୋଇଛି ।
