ରେଙ୍ଗାଲିକ୍ୟାମ୍ପ: ଅତାବିରା ସ୍ଥିତ ଆରୋଗ୍ୟମ୍ ଚିକିତ୍ସାଳୟରେ ପ୍ରତ୍ୟହ ସୋମବାରରୁ ଶନିବାର ପର୍ଯ୍ୟନ୍ତ ସକାଳ ୮ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ମହାନଦୀ ନେତ୍ର ଚିକିତ୍ସାଳୟର ନିର୍ଦ୍ଦେଶକ୍ରମେ ବିଭିନ୍ନ ପ୍ରକାର ଚକ୍ଷୁ ରୋଗର ଚିକିତ୍ସା କରାଯାଉଛି । ଏଥିରେ ଯେଉଁ ଚକ୍ଷୁ ରୋଗୀମାନଙ୍କ ପାଇଁ ଅସ୍ତ୍ରୋପଚାରର ଆବଶ୍ୟକତା ପଡ଼େ ନାହିଁ ତାଙ୍କୁ ଚଷମା ଦିଆଯାଇ ଆଖିକୁ ଠିକ୍ କରାଯାଉଛି । ସାଧାରଣ ଚକ୍ଷୁ ରୋଗଗୁଡ଼ିକ ଔଷଧ ଦ୍ଵାରା ଠିକ୍ କରାଯାଉଛି । କିନ୍ତୁ ଯେଉଁ ଚକ୍ଷୁ ରୋଗୀଙ୍କ ପାଇଁ ଅସ୍ତ୍ରୋପଚାରର ଆବଶ୍ୟକତା ପଡୁଛି, ସେମାନଙ୍କୁ ମାଗଣାରେ ବୀରମହାରାଜପୁର ପଣ୍ଡାପାଲି ସ୍ଥିତ ଚକ୍ଷୁ ଚିକିତ୍ସାଳୟରେ ଚିକିତ୍ସା କରାଯାଉଛି । ରୋଗୀମାନଙ୍କୁ ଗାଡ଼ିରେ ନେବା ଆଣିବା, ସେଠି ରହିବା, ଖାଇବା ତଥା ଔଷଧ ଆଦି ସମସ୍ତ ପ୍ରକାର ସୁବିଧା ନିଶୁଳ୍କରେ ଯୋଗାଇ ଦିଆଯାଉଛି । ସେଠାରେ ପୁଣିଥରେ ପରୀକ୍ଷା ପରେ ଅସ୍ତ୍ରୋପଚାର କରାଯାଏ । ଅସ୍ତ୍ରୋପଚାରର ଗୋଟିଏ ଦିନ ପରେ ପୁଣି ଆରୋଗ୍ୟମକୁ ସେମାନଙ୍କୁ ପହଞ୍ଚାଇ ଦିଆଯାଏ । ରୋଗୀମାନଙ୍କୁ ପୁଣି ଏହି ଆରୋଗ୍ୟମରେ ଅସ୍ତ୍ରୋପଚାର ପରେ ସବୁକିଛି ଠିକ ରହିଛି ନା ନାହିଁ ପରୀକ୍ଷା କଲାପରେ ତାଙ୍କ ଘରକୁ ପଠାଯାଏ । ନିର୍ଦ୍ଧାରିତ ସମୟରେ ପୁଣି ସେମାନଙ୍କର ପରୀକ୍ଷା ଏହିଠାରେ ହୁଏ । କେବଳ ସେତିକି ନୁହେଁ ସଫଳ ଅସ୍ତ୍ରୋପଚାର ଯୋଗୁଁ ଅତାବିରାର ୨୦୦ ଜଣରୁ ଊର୍ଦ୍ଧ୍ବ ଚକ୍ଷୁ ରୋଗୀ ଉପକୃତ ହୋଇଥିବା ଡଃ ଅଜିତ ବାରିକ୍ ପ୍ରକାଶ କରିଛନ୍ତି । ପ୍ରତିଦିନ ଜଣେ ସହକାରୀ ଚକ୍ଷୁ ଚିକିତ୍ସକ ଶୁଭମ୍ ମହାପାତ୍ର ଆସି ଏଠାରେ ରୋଗୀଙ୍କ ନାମ ପଞ୍ଜିକୃତ କରି ପରୀକ୍ଷା ନିରୀକ୍ଷା କରି ସେମାନଙ୍କର କି ଅସୁବିଧା ରହିଛି ତାକୁ ରେକର୍ଡ କରିଥାନ୍ତି । ପ୍ରତି ଶୁକ୍ରବାର ଦିନ ଜଣେ ଚକ୍ଷୁ ବିଶେଷଜ୍ଞ ଡଃ ଦେବାଶିଷ ମେହେର ଆସି ଲେନ୍ସ ମାଧ୍ୟମରେ ପୁଣି ଏହି ରୋଗୀମାନଙ୍କୁ ପରୀକ୍ଷା କଲାପରେ ଅସ୍ତ୍ରୋପଚାର ଯଦି ଆବଶ୍ୟକ ପଡେ ତେବେ ତାଙ୍କୁ ବୀରମହାରାଜପୁରକୁ ପଠାଯାଏ । ଏଠାରେ ଥିବା ସେବିକା ସୁଜାତା ପ୍ରଧାନ ଚକ୍ଷୁ ରୋଗୀଙ୍କ ଦେଖାଶୁଣା କରିଥାନ୍ତି ।
Comments are closed.