ମୁମ୍ବଇ : ୧୯୯୦ରେ ମୁକ୍ତିଲାଭ କରିଥିବା ଅମିର ଖାନ-ମାଧୁରୀ ଦୀକ୍ଷିତଙ୍କ ଅଭିନୀତ ଲୋକପ୍ରିୟ ଚଳଚ୍ଚିତ୍ର ‘ଦିଲ୍’ର ଦ୍ୱିତୀୟ ଭାଗ ନିର୍ମାଣ ହେବାକୁ ଯାଉଛି। ଏନେଇ ସୂଚନା ଦେଇଛନ୍ତି ନିଜେ ଚଳଚ୍ଚିତ୍ରର ନିର୍ଦ୍ଦେଶକ ଇନ୍ଦ୍ର କୁମାର। ଦ୍ୱିତୀୟ ଭାଗର ନାମ ମଧ୍ୟ ‘ଦିଲ୍’ ହିଁ ରଖାଯିବ ବୋଲି ଶୁଣିବାକୁ ମିଳିଛି।
ନିର୍ଦ୍ଦେଶକ ଇନ୍ଦ୍ର ଚଳଚ୍ଚିତ୍ର ‘ଟୋଟାଲ ଧମାଲ’ର ପ୍ରମୋଶନ ସମୟରେ ଏ ବିଷୟରେ ସ୍ପଷ୍ଟ କରିଛନ୍ତି ଯେ, ଖୁବଶୀଘ୍ର ଆମେ ସୁପରହିଟ୍ ଚଳଚ୍ଚିତ୍ର ‘ଦିଲ୍’ର ସିକ୍ୱେଲ ନିର୍ମାଣ କରିବୁ। ତାଙ୍କ କହିବା ଅନୁସାରେ, ଦୀର୍ଘଦିନ ଧରି ଆମେ ଚଳଚ୍ଚିତ୍ରର ସିକ୍ୱେଲ ନିର୍ମାଣର ଯୋଜନା କରୁଛୁ। ହେଲେ ଗୋଟିଏ ଭଲ ସ୍କ୍ରିପ୍ଟର ଅପେକ୍ଷାରେ ଥିଲୁ। ଏବେ ସ୍କ୍ରିପ୍ଟ ମିଳିଯାଇଛି। ଚଳଚ୍ଚିତ୍ରକୁ ନେଇ ବାକି ପ୍ରସ୍ତୁତି ମଧ୍ୟ ଖୁବଶୀଘ୍ର ଆରମ୍ଭ ହୋଇଯିବ। ତେବେ ସିକ୍ୱେଲର ଘୋଷଣା ପରେ ଏବେ ଏଥିରେ ମୁଖ୍ୟ ଭୂମିକାରେ କିଏ ଅଭିନୟ କରିବେ ଏନେଇ ଚର୍ଚ୍ଚା ଜୋର ଧରିଛି। ହେଲେ ଏନେଇ ନିର୍ଦ୍ଦେଶକଙ୍କ ଠାରୁ କୌଣସି ସୂଚନା ମିଳିପାରି ନାହିଁ।
