ଭାରତର ତୃତୀୟ ପରାଜୟ, ଅଷ୍ଟ୍ରେଲିଆ ୩-୦ ଗୋଲରେ ବିଜୟ

ଭୁବନେଶ୍ୱର: କଳିଙ୍ଗ ଷ୍ଟାଡିୟମରେ ଚାଲିଥିବା ଏଫଆଇଏଚ ମହିଳା ପ୍ରୋ ଲିଗ୍‍ ହକି ୨୦୨୩-୨୪ରେ ଭାରତୀୟ ଦଳ କ୍ରମାଗତ ତୃତୀୟ ଥର ପରାଜିତ ହୋଇଛି । ବୁଧବାର ସନ୍ଧ୍ୟାରେ ଖେଳା ଯାଇଥିବା ଏକତରଫା ମ୍ୟାଚରେ ଅଷ୍ଟ୍ରେଲିଆ ୩-୦ଗୋଲରେ ଆୟୋଜକ ଭାରତୀୟ ମହିଳା ଦଳକୁ ପରାସ୍ତ କରିଥିଲା । ପ୍ରଥମ ଦୁଇଟି ମ୍ୟାଚରେ ପରାଜିତ ହୋଇଥିବା ଭାରତ ତୃତୀୟ ମ୍ୟାଚରେ ମଧ୍ୟ ଦୟନୀୟ ପ୍ରଦର୍ଶନ କରିଥିଲା । ପ୍ରଥମ କ୍ୱାର୍ଟର ତଥା ଖେଳର ୧୯ ମିନିଟରେ ଅଷ୍ଟ୍ରେଲିଆ ପକ୍ଷରୁ ଷ୍ଟିୱାର୍ଟ ଗ୍ରେସ୍‍ ଗୋଲ ଦେଇ କଙ୍ଗାରୁ ଦଳକୁ ୧-୦ରେ ଆଗୁଆ କରିଥିଲେ । ୨୩ ମିନିଟରେ ଅଷ୍ଟ୍ରେଲିଆକୁ ପେନାଲଟି କର୍ଣ୍ଣର ମିଳିଥିଲା । ଷ୍ଟିୱାର୍ଟ ଟାଟୁମ୍‍ ଗୋଲ ଦେଇ ଦଳକୁ ୨-୦ରେ ଆଗୁଆ କରିଥିଲେ ।
ତୃତୀୟ କ୍ୱାର୍ଟର ଖେଳ ଗୋଲଶୂନ୍ୟ ରହିଥିଲା । ଅନ୍ତିମ କ୍ୱାର୍ଟର ତଥା ଖେଳର ୫୫ମିନିଟରେ ଅଷ୍ଟ୍ରେଲିଆ ପକ୍ଷରୁ କାଇଲିନ୍‍ ନୋବାସ୍‍ ୩ୟ ଗୋଲ ଦେଇ ଦଳକୁ ୩-୦ରେ ଆଗୁଆ କରିଥିଲେ । ଭାରତ ଗୋଲ ଦେବା ନେଇ ଶେଷ ମିନିଟ୍‍ ପର୍ଯ୍ୟନ୍ତ ଉଦ୍ୟମ କରି ମଧ୍ୟ ବିଫଳ ହୋଇଥିଲା । ୪ଟି ପେନାଲଟି କର୍ଣ୍ଣର ପାଇ ମଧ୍ୟ ଭାରତୀୟ ଦଳ ଗୋଟିଏ ମଧ୍ୟ ଗୋଲରେ ପରିଣତ କରିପାରିନଥିଲା ।