କୃଷି ଆଇନର ନକଲ ପୋଡି ହୋଲିକା ଦହନ ପାଳିଲେ ବିକ୍ଷୋଭକାରୀ ଚାଷୀ

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ଦିଲ୍ଲୀ ସୀମାରେ ଦୀର୍ଘଦିନ ହେଲା ବିକ୍ଷୋଭ କରୁଥିବା ଚାଷୀମାନେ ରବିବାର ଦିନ ପବିତ୍ର ହୋଲି ପର୍ବକୁ ସ୍ୱତନ୍ତ୍ର ଢଙ୍ଗରେ ପାଳନ କରିଛନ୍ତି। ଏହିଦିନ ହୋଲିକା ଦହନ୍‍ ଅନୁଷ୍ଠିତ ହେଉଥିବାବେଳେ ବିକ୍ଷୋଭକାରୀ ଚାଷୀମାନେ ନୂଆ କୃଷି ଆଇନର ନକଲକୁ ପୋଡି ଏହି ପର୍ବ ପାଳନ କରିଛନ୍ତି। ଏଥି ସହିତ ସେମାନେ କହିଛନ୍ତି ଯେ ନୂଆ କୃଷି ଆଇନକୁ ସଂପୂର୍ଣ୍ଣ ଉଚ୍ଛେଦ କରାଯାଇ ସର୍ବନିମ୍ନ ସହାୟକ ମୂଲ୍ୟ ଉପରେ ନୂଆ ପୃଥକ ଆଇନ ଅଣାନଯିବା ପର୍ଯ୍ୟନ୍ତ ସେମାନେ ବିକ୍ଷୋଭ ଜାରି ରଖିବେ।

କୃଷକ ସଂଗଠନ ସମୂହର ଏକ ମିଳିତ ସାମ୍ମୁଖ୍ୟ ‘ସାମ୍ମୁଖ୍ୟ କିଷାନ ମୋର୍ଚ୍ଚା’ କହିଛି, ଏହା ଏପ୍ରିଲ ୫ ତାରିଖ ଦିନ ଏଫସିଆଇ ବଂଚାଅ ଦିବସ ପାଳନ କରିବ। ଏହିଦିନ ସମଗ୍ର ଦେଶରେ ପୂର୍ବାହ୍ନ ୧୧ଟାରୁ ଅପରାହ୍ଣ ୫ଟା ପର୍ଯ୍ୟନ୍ତ ଏଫସିଆଇ ଅଧିକାରୀମାନଙ୍କୁ ଘେରାଉ କରାଯିବ। ସରକାର ସର୍ବନିମ୍ନ ସହାୟକ ମୂଲ୍ୟ (ଏମଏସ୍‍ପି) ଏବଂ ସାଧାରଣ ବଣ୍ଟନ ବ୍ୟବସ୍ଥାକୁ ବନ୍ଦ କରିଦେବା ସକାଶେ ପରୋକ୍ଷରେ ବହୁବାର ଉଦ୍ୟମ କରିଛନ୍ତି। ଗତ କିଛିବର୍ଷ ମଧ୍ୟରେ ଏଫସିଆର ବଜେଟ ପରିମାଣ ମଧ୍ୟ ହ୍ରାସ କରାଯାଇଛି। ନିକଟରେ ଶସ୍ୟ ସଂଗ୍ରହ ନିମନ୍ତେ ଏଫସିଆଇ ତାହାର ନିୟମ ମଧ୍ୟ ପରିବର୍ତ୍ତନ କରିଛି ବୋଲି ମୋର୍ଚ୍ଚା ପକ୍ଷରୁ କୁହାଯାଇଛି।