ଡେସ୍କ: ଦେଶରେ ବେଆଇନ ଋଣ ଆପ୍ ଦ୍ରୁତ ଗତିରେ ବୃଦ୍ଧି ପାଉଛି। ଏହା ସହ ସାଇବର ଠକେଇ ମାମଲା ମଧ୍ୟ ବଢିବାରେ ଲାଗିଛି। ବଢୁଥିବା ସାଇବର ଠକେଇକୁ ରୋକିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପ୍ରସ୍ତୁତ ହୋଇଛି । ନୂଆଦିଲ୍ଲୀ: ଅନଲାଇନ୍ ଠକେଇରୋକିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ ଡିଜିଟାଲ୍ ଇଣ୍ଡିଆ ଟ୍ରଷ୍ଟ ଏଜେନ୍ସି ଅର୍ଥାତ୍ ଡିଆଇଜିଆଇଟିଏ ଗଠନ କରିବାକୁ ଗମ୍ଭୀରତାର ସହ ବିଚାର କରୁଛି।
ପ୍ରସ୍ତାବିତ ଡିଜିଟାଲ ଇଣ୍ଡିଆ ଟ୍ରଷ୍ଟ ଏଜେନ୍ସି ଡିଜିଟାଲ ଋଣ ଆପକୁ ଯାଞ୍ଚ କରିବ ଏବଂ ଭେରିଫାଏଡ ଆପଗୁଡିକର ଏକ ସାର୍ବଜନୀନ ରେଜିଷ୍ଟର ପ୍ରସ୍ତୁତ କରିବ ବୋଲି ସୂତ୍ରରୁ ପ୍ରକାଶ। ଯେଉଁ ଆପଗୁଡିକରେ ଡିଆଇଜିଆଇଟିଏର ଯାଞ୍ଚ ଚିହ୍ନ ନାହିଁ ସେମାନଙ୍କୁ ଅଣ-ଅନୁମୋଦିତ ଭାବରେ ବିବେଚନା କରାଯିବା।
ଏହା ଡିଜିଟାଲ କ୍ଷେତ୍ରରେ ଆର୍ଥିକ ଅପରାଧ ବିରୋଧରେ ଲଢ଼େଇରେ ସହାୟକ ହେବ। ଡିଜିଟାଲ ଋଣ ଆପର ତଦନ୍ତ ଦାୟିତ୍ୱ ଡିଆଇଜିଆଇଟିଏକୁ ଦିଆଯିବ ବୋଲି ସେ କହିଛନ୍ତି। ସୂତ୍ର ଅନୁଯାୟୀ, ଏହି ଯାଞ୍ଚ ପ୍ରକ୍ରିୟା ଡିଜିଟାଲ କ୍ଷେତ୍ରରେ ଅଧିକ ସ୍ୱଚ୍ଛତା ଏବଂ ଉତ୍ତରଦାୟିତ୍ୱ ସୃଷ୍ଟି କରିବାରେ ସାହାଯ୍ୟ କରିବ।
ଇତିମଧ୍ୟରେ ରିଜର୍ଭ ବ୍ୟାଙ୍କ ୪୪୨ଟି ଡିଜିଟାଲ ଲୋନ୍ ଆପର ତାଲିକା ଆଇଟି ମନ୍ତ୍ରଣାଳୟକୁ ସେୟାର କରିଛି, ଯାହାଦ୍ୱାରା ଏହାକୁ ଗୁଗୁଲରୁ ହଟାଯାଇ ପାରିବ। ସେପ୍ଟେମ୍ବର ୨୦୨୨ରୁ ଅଗଷ୍ଟ ୨୦୨୩ ମଧ୍ୟରେ ଗୁଗୁଲ ଏହାର ଆପ୍ ଷ୍ଟୋରରୁ ୨ ହଜାର ୨୦୦ରୁ ଅଧିକ ଡିଜିଟାଲ ଋଣ ଆପ୍ ହଟାଇ ଦେଇଛି।
ଗୁଗଲ ପ୍ଲେ ଷ୍ଟୋରରେ ଋଣ ଆପର ପ୍ରବର୍ତ୍ତନ ଉପରେ ନିଜର ନୀତି ଅପଡେଟ୍ କରିଛି ଏବଂ କେବଳ ସେହି ଆପଗୁଡିକୁ ଅନୁମତି ଦିଆଯାଇଛି ଯାହା ଆରବିଆଇର ନିୟନ୍ତ୍ରିତ ସଂସ୍ଥା କିମ୍ବା ଭାଗିଦାରୀରେ କାର୍ଯ୍ୟ କରୁଛି। ରିଜର୍ଭ ବ୍ୟାଙ୍କ ଏବଂ ଅର୍ଥ ମନ୍ତ୍ରଣାଳୟ ଅଧୀନରେ ଥିବା ଆର୍ଥିକ ସେବା ବିଭାଗର ଅନୁରୋଧ କ୍ରମେ ଗୁଗୁଲ୍ ଏହି ନୀତି ପରିବର୍ତ୍ତନ କରିଛି।
Comments are closed.