ସମାଜ ଡିଜିଟାଲ ଡେସ୍କ: ଗତ ଜୁନ ୧୭ରେ କାଞ୍ଚନଜଙ୍ଗା ଏକ୍ସପ୍ରେସକୁ ଏକ ମାଳବାହୀ ଟ୍ରେନ ଧକ୍କା ଦେବା ଫଳରେ ୧୦ ଜଣଙ୍କ ମୃତ୍ୟୁ ଘଟିଥିଲା ଏବଂ ୪୩ ଜଣ ଆହତ ହୋଇଥିଲେ। ମୃତକଙ୍କ ମଧ୍ୟରେ ମାଲବାହୀ ଟ୍ରେନର ଲୋକୋ ପାଇଲଟ ଅନିଲ କୁମାର ବି ସାମିଲ ଥିଲେ। ତେବେ ଦୁର୍ଘଟଣା ପାଇଁ ଲୋକୋ ପାଇଲଟ ଅନିଲ କୁମାରଙ୍କୁ ଦାୟୀ କରାଯାଇଥିଲା। ଯାହାକୁ ନେଇ ତାଙ୍କ ପରିବାର ଲୋକେ ଭାଙ୍ଗି ପଡ଼ିଥିଲେ। ହେଲେ ଏହି ଘଟଣାର ତଦନ୍ତ ଏବେ ଶେଷ ହୋଇଛି ଏବଂ ଅନିଲଙ୍କୁ ମିଳିଛି କ୍ଲିନ ଚିଟ୍। ଅର୍ଥାତ ଅନିଲ ଏହି ଘଟଣା ପାଇଁ ଦାୟୀ ନୁହନ୍ତି ବୋଲି ସ୍ପଷ୍ଟ କରିଛନ୍ତି ମୁଖ୍ୟ ରେଳ ନିରାପତ୍ତା ଆୟୁକ୍ତ। ରେଲଓ୍ବେ ପକ୍ଷରୁ ତଦନ୍ତ ରିପୋର୍ଟ ଆସିବା ପରେ ଶାନ୍ତିରେ ନିଃଶ୍ଵାସ ନେଇଛନ୍ତି ଅନିଲଙ୍କ ପରିବାର। ଏବେ ଅନିଲଙ୍କ ଆତ୍ମାକୁ ଶାନ୍ତି ମିଳିବ ବୋଲି କହିଛନ୍ତି ଅନିଲଙ୍କ ସ୍ତ୍ରୀ ରୋଶନୀ କୁମାର।
ରୋଶନୀ ଗଣମାଧ୍ୟମକୁ କହିଛନ୍ତି, ଟ୍ରେନ ଦୁର୍ଘଟଣାର କିଛି ସମୟ ପରେ ବିନା ତଦନ୍ତରେ ତାଙ୍କ ସ୍ଵାମୀଙ୍କ ଉପରେ ସମସ୍ତ ଦୋଷ ଲଦି ଦିଆଯାଇଥିଲା। ତାଙ୍କ ମୃତ୍ୟୁରେ ସେ ଏବଂ ପରିବାର ଲୋକେ ଭାଙ୍ଗି ପଡ଼ିଥିବାବେଳେ ତାଙ୍କୁ ଯେତେବେଳେ ଘଟଣା ପାଇଁ ଦାୟୀ କରାଗଲା ତାହା ସେମାନଙ୍କୁ ବହୁତ ଦୁଃଖ ଦେଇଥିଲା। କିନ୍ତୁ ଏବେ ଶାନ୍ତି ମିଳିଛି। ରେଲଓ୍ବେ ପକ୍ଷରୁ ଉପଯୁକ୍ତ ତଦନ୍ତ କରାଯାଇ ତାଙ୍କ ସ୍ଵାମୀଙ୍କୁ ଦୋଷମୁକ୍ତ କରାଯାଇଥିବାରୁ ସେ ଅଶ୍ଵସ୍ତି ଅନୁଭବ କରୁଛନ୍ତି ବୋଲି କହିଛନ୍ତି।
