ଆଦିବାସୀ ଅଧ୍ୟୁଷିତ ଅଞ୍ଚଳରେ ତିକ୍ତ ହେଉଛି କି ରାଜନୈତିକ ବାତାବରଣ, ସମୟକୁ ଦେଖି ବଢିବକି ସମ୍ବେଦନଶୀଳ ବୁଥ୍ ସଂଖ୍ୟା

ଲକ୍ଷ୍ମୀପୁର: ସମୟ ଓ ବାତାବରଣକୁ ନେଇ ଚଳିତ ତ୍ରିସ୍ତରୀୟ ନିର୍ବାଚନରେ ବୃଦ୍ଧି ପାଇପାରେ ସମ୍ବେନଶୀଳ ବୁଥ୍ ସଂଖ୍ୟା। କେବଳ ଯେ କୋରାପୁଟ ଜିଲା ଲକ୍ଷ୍ମୀପୁର ବିଧାନସଭା ନିର୍ବାଚନମଣ୍ଡଳୀରେ ଏଭଳି ସମ୍ଭାବନା ରହିଛି ତା ନୁହେଁ, କ୍ରମଶଃ କୋରାପୁଟ ଜିଲାରେ ଉପକୂଳବର୍ତ୍ତୀ ଜିଲ୍ଲାମାନଙ୍କ ପରି ରାଜନୈତିକ ବାତାବରଣ ଆଦିବାସୀ ଅଧ୍ୟୁଷିତ ଅଞ୍ଚଳରେ ଦେଖିବାକୁ ମିଳୁଛି। ପୂର୍ବରୁ ଏଠାରେ ପ୍ରାର୍ଥୀ ପ୍ରାର୍ଥୀ ହୁଅନ୍ତୁ କିମ୍ବା ଦଳ ଦଳ ମଧ୍ୟରେ ସେଭଳି ତିକ୍ତତା ଅନୁଭୂତ ହେଉ ନଥିଲେ। କିନ୍ତୁ ବର୍ତ୍ତମାନ ଦୁର୍ଗମ ଆଦିବାସୀ ଅଧ୍ୟୁଷିତ ଗାଁ ଗାଁରେ ରାଜନୈତିକ ବାତାବରଣ ତିକ୍ତ ହେଉଥିବା ପରିଲକ୍ଷିତ ହେଉଛି।

ପୂର୍ବ ନିର୍ବାଚନ ଗୁଡ଼ିକର ଘଟଣା ବଳିକୁ ନେଇ କେଉଁ ବୁଥ୍ ଗୁଡ଼ିକ କେତେ ସମ୍ବେଦନଶୀଳ ଓ ଅତି ସମ୍ବେଦନଶୀଳ ତାହା ଚିହ୍ନଟ କରାଯାଇଛି। ଏପରିକି ଏହାରି ଆଧାରରେ ବୁଥଗୁଡ଼ିକରେ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଉଛି। କେଉଁଠି ଜଣେ ଗ୍ରାମ ରକ୍ଷୀ ଓ ଜଣେ ଗୃହ ରକ୍ଷୀଙ୍କୁ ନିଯୁକ୍ତ କରାଯାଉଛି ଓ ଯେଉଁଠି ସମ୍ବେଦନଶୀଳ ବୁଥ୍ ରହିଛି ସେଠାରେ ଜଣେ ଲେଖାଏଁ କନଷ୍ଟେବଳଙ୍କୁ ନିୟୋଜିତ କରାଯାଉଛି। କିନ୍ତୁ ଗତ ଯେଉଁ ଭୋଟ ଗୁଡ଼ିକ ହୋଇଥିଲା ସେତେବେଳେ କୋରାପୁଟ ଭଳି ଆଦିବାସୀ ଅଧ୍ୟୁଷିତ ଅଞ୍ଚଳରେ ସେଭଳି ତିକ୍ତତା ଅନୁଭୂତ ହେଉ ନଥିଲା ଯେପରି ଏବେ ଦେଖିବାକୁ ମିଳୁଛି। ସେଥିପାଇଁ ପୁର୍ବ ନିର୍ବାଚନ ଗୁଡ଼ିକର ଇତିହାସ ବଦଳିବା ସହିତ ଯେତିକି ସମ୍ବେଦନଶୀଳ ଓ ଅତି ସମ୍ବେଦନଶୀଳ ବୁଥ୍ ଥିଲା ତାହା ବୃଦ୍ଧି ପାଇବାର ଆଶଙ୍କା ଥିବା କହନ୍ତି ରାଜନୀତି ସମୀକ୍ଷକମାନେ। ଲକ୍ଷ୍ମୀପୁର ବ୍ଲକରେ ବର୍ତ୍ତମାନ ୧୫୧ ବୁଥ୍ ମଧ୍ୟରୁ ୨୪ ବୁଥ ସମ୍ବେଦନଶୀଳ ତାଲିକାରେ ରହିଥିବା ବେଳେ ଅତି ସମ୍ବେଦନଶୀଳ ବୁଥ୍ ନାହିଁ। ତେବେ ବର୍ତ୍ତମାନ ରାଜନୈତିକ ବାତାବରଣ ଯାହା ଦେଖିବାକୁ ମିଳୁଛି ନିର୍ବାଚନ ପରେ ସମ୍ବେଦନଶୀଳ ଓ ଅତି ସମ୍ବେଦନଶୀଳ ବୁଥ୍ ସଂଖ୍ୟା ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି।