ହାଇଦ୍ରାବାଦ୍: ତେଲୁଗୁ ଦେଶମ ପାର୍ଟି ରାଜ୍ୟ ସଭା ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ୱାଇ ଏସ୍ ଚୌଧୁରୀଙ୍କ ପ୍ରାୟ ୫,୭୦୦ କୋଟି ଟଙ୍କାର ଜାଲିଆତି କାରବାର ଧରାପଡ଼ିଥିବା ପ୍ରବର୍ତ୍ତନ ନିର୍ଦେଶାଳୟ(ଇଡି) ଅଧିକାରୀମାନେ ସୂଚନା ଦେଇଛନ୍ତି। ଜାଲ୍ କାଗଜପତ୍ର ଜମା କରି ଚୌଧୁରୀଙ୍କ ମାଲିକାନାରେ ଥିବା କମ୍ପାନୀ ନାମରେ ବିପୁଳ ପରିମାଣର ବ୍ୟାଙ୍କ ଋଣ ଉଠାଯାଇଥିବା ଇଡି ଅଧିକାରୀମାନେ ତଦନ୍ତ ବେଳେ ଜାଣିପାରିଛନ୍ତି। ଆସନ୍ତା ୨୭ ତାରିଖ ଦିନ ତାଙ୍କୁ ହାଜର ହେବା ପାଇଁ ଇଡି ପକ୍ଷରୁ ସମନ୍ ଜାରି କରାଯାଇଛି।
ଗତ ଶୁକ୍ରବାର ସାଂସଦ ଶ୍ରୀ ଚୌଧୁରୀଙ୍କ ହାଇଦ୍ରାବାଦ୍ ଓ ନୂଆଦିଲ୍ଲୀ ସ୍ଥିତ ବାସଭବନରେ ଇଡି ଅଧିକାରୀମାନେ ଚଢ଼ଉ କରି କାଗଜପତ୍ର ଯାଞ୍ଚ କରିଥିଲେ। ଯାଞ୍ଚ ପରେ ସେଠାରେ ଥିବା ଫେରାରି, ରେଞ୍ଜ ରୋଭର, ମର୍ସିଡିଜ୍ ବେଞ୍ଜର ୬ଟି ବିଳାସପୂର୍ଣ୍ଣ କାରକୁ ଇଡି ଅଧିକାରୀମାନେ ଜବତ କରିଛନ୍ତି। ସାଂସଦ ଓ ତାଙ୍କ ସହଯୋଗୀମାନେ ୧୨୦ଟି ସେଲ୍ କମ୍ପାନୀ(ଜାଲ୍) ଚଲାଉଥିବା ମଧ୍ୟ ଜଣାପଡ଼ିଛି। ତାଙ୍କ ମାଲିକାନାରେ ଥିବା କମ୍ପାନୀ ସେଣ୍ଟ୍ରାଲ୍ ବ୍ୟାଙ୍କ ଅଫ୍ ଇଣ୍ଡିଆରୁ ୧୩୩ କୋଟି, ଆନ୍ଧ୍ର ବ୍ୟାଙ୍କରୁ ୭୧ କୋଟି ଓ କର୍ପୋରେସନ୍ ବ୍ୟାଙ୍କରୁ ୧୫୯ କୋଟି ଟଙ୍କା ନେଇ ଶୁଝି ନଥିଲେ। ଏହାପରେ ତିନି ବ୍ୟାଙ୍କ ପକ୍ଷରୁ ସିବିଆଇରେ ଅଭିଯୋଗ କରାଯାଇଥିଲା। ସିବିଆଇ ବେଙ୍ଗାଲୁରୁ ଶାଖାର ତଦନ୍ତ ଆଧାରରେ ଇଡି ପକ୍ଷରୁ ଚଢ଼ଉ କରାଯାଇଥିଲା। ଅପରପକ୍ଷରେ ଇଡିର ଅଭିଯୋଗକୁ ସାଂସଦ ଶ୍ରୀ ଚୌଧୁରୀ ଅସ୍ୱୀକାର କରିଛନ୍ତି। କୌଣସି କମ୍ପାନୀର ପରିଚାଳନା ମଣ୍ଡଳୀରେ ତାଙ୍କ ନାମ ନଥିବା ସେ ଦାବି କରିଛନ୍ତି।
ଟିଡିପି ସାଂସଦଙ୍କ ୫,୭୦୦ କୋଟି ଟଙ୍କାର ଜାଲିଆତି ଧରାପଡ଼ିଲା
Popular Categories
Previous article
Next article