ନୂଆଦିଲ୍ଲୀ – ଏବେ ଦେଶରେ ବାହାନ ବା ଗାଡି ଚାଳକମାନଙ୍କୁ ଭୁଲ୍ ଗାଡି ଚାଳନା ପାଇଁ ଇ- ଚାଲାଣ ପଠାଯାଉଛି । ହେଲେ କିଛି ଠକ ଏହାର ଫାଇଦା ନେବା ଆରମ୍ଭ କଲେଣି । ଗାଡି ମାଲିକମାନଙ୍କର କିଛି ତଥ୍ୟ ହାସଲ କରିବା ପରେ ସେମାନଙ୍କୁ ଇ ଚାଲାଣର ମେସେଜ୍ ପଠାଉଛନ୍ତି । ଏହାପରେ ସେଥିରେ ଦିଆଯାଇଥିବା ଲିଙ୍କ୍ରେ କ୍ଲିକ୍ କରି ପେମେଣ୍ଟ ଦେବା ପାଇଁ କହୁଛନ୍ତି ।
ପୁଲିସର ସୂଚନା ଅନୁସାରେ ସ୍କାମର୍ସ ମାନେ ଅବିକଳ ପରିବହନ ବିଭାଗର ମେସେଜ୍ ପରି ମେସେଜ୍ ପଠାଉଛନ୍ତି । ଏହାକୁ ଦେଖିଲେ ଅସଲି ପରି ଲାଗିବ । ଏଥିରେ ପରିବହନ ବିଭାଗର ନକଲି ଓ୍ୱେବସାଇଟ୍ ଲିଙ୍କ୍ ଦେଉଛନ୍ତି । ଏଥିରେ କ୍ଲିକ୍ କରି ବ୍ୟକ୍ତିଗତ ତଥ୍ୟ ଦେବା ପାଇଁ କହିବା ସହ ଚାଲାଣ ଭରିବା ପାଇଁ ମେସେଜ୍ ଦେଉଛନ୍ତି ।
କିଛି ଲୋକ ହଡବଡରେ ଏହି ଲିଙ୍କ୍ କ୍ଲିକ୍ କରି ଚାଲାଣ ଭରୁଛନ୍ତି । ମାତ୍ର ପରେ ସେମାନେ ଠକେଇର ଶିକାର ହୋଇଥିବା ଜାଣିବା ପାଇଁ ପାଉଛନ୍ତି । ପରିବହନ ବିଭାଗର ନକଲି ଓ୍ୱେବସାଇଟ୍ ମଧ୍ୟ ଏଥିପାଇଁ ତିଆରି କରିଛନ୍ତି ।
ଦେଶରେ ସାଇବର ଅପରାଧ ବୃଦ୍ଧି ପାଇଛି । ବିଭିନ୍ନ ଢଙ୍ଗରେ ଲୋକମାନଙ୍କୁ ଠକିବା ପାଇଁ ଠକ ପଛାଉ ନାହାନ୍ତି । ଏବେ ମିଛ ଇ-ଚାଲାଣ ପଠାଇ ଲୋକମାନଙ୍କୁ ସେମାନେ ଠକୁଥିବା ବିଷୟ ସାମ୍ନାକୁ ଆସିଛି ।
ଏପରି ମେସେଜ୍ ଆସିଲେ ଭଲକରି ଏହାକୁ ଯାଞ୍ଚ କରିବା ପାଇଁ ସାଇବର ପୁଲିସ ପକ୍ଷରୁ କୁହାଯାଇଛି । କୌଣସି ମିଛ ବା ନକଲି ଓ୍ୱେବସାଇଟ୍ରେ କୌଣସି ବ୍ୟକ୍ତିଗତ ତଥ୍ୟ ଅପଲୋଡ୍ ନକରିବା ପାଇଁ ନିର୍ଦେଶ ଦିଆଯାଇଛି ।
