କରୋନା କାଳରେ ଭାରତରେ ଘଟୁଛି ଘନଘନ ଭୂମିକମ୍ପ । ଗୁରୁବାର ଅପରାହ୍ନରେ ଭାରତ-ବାଂଲାଦେଶ ସୀମାନ୍ତବର୍ତୀ ତ୍ରିପୁରାରେ ୨.୮ ତୀବ୍ରତାର ଭୂମିକମ୍ପ ରେକର୍ଡ଼ କରାଯାଇଛି । ନ୍ୟାସନାଲ ସେଣ୍ଟର ଫର ସେସମୋଲୋଜି (ଏନସିଏସ୍) ଅନୁଯାୟୀ ଧର୍ମାନଗରଠାରୁ ୬୩ କିଲୋମିଟର ଉତ୍ତର-ପୂର୍ବରେ ଭୂକମ୍ପର କେନ୍ଦ୍ରସ୍ଥଳ ସୃଷ୍ଟି ହୋଇଥିଲା । ତେବେ ଭୂକମ୍ପରେ କ୍ଷୟକ୍ଷତି ଜନିତ କୌଣସି ସୂଚନା ମିଳିନାହିଁ। ଆଜି ଅପରାହ୍ନ ୩ଟା ୪୮ ମିନିଟରେ ଏହି ଭୂମିକମ୍ପ ଅନୁଭୂତ ହୋଇଛି ।
ଆଜି ଦେଶର ଗୋଟିଏ ସ୍ଥାନରେ ଭୂକମ୍ପ ଅନୁଭୂତ ହୋଇଥିବାବେଳେ ଗତକାଲି ଉତ୍ତରପୂର୍ବ ଭାରତରେ ୪ଥର ଭୂକମ୍ପ ଅନୁଭୂତ ହୋଇଛି । ଆସାମ-ନାଗାଲାଣ୍ଡ ଅଞ୍ଚଳରେ ରାତି ୯.୩୧ ମିନିଟରେ ୩.୮ ତୀବ୍ରତା, ମିଆଁମାର-ଭାରତ ସୀମାନ୍ତରେ ରାତି ୭ଟା ୪୪ ମିନିଟରେ ୪.୮ ତୀବ୍ରତା, ସକାଳ ୭ଟା ୨୮ରେ ଦିଲ୍ଲୀ-ହରିଆଣା ଅଞ୍ଚଳରେ ୨.୮ ତୀବ୍ରତା ଓ ମଙ୍ଗଳବାର ରାତି ୨ଟା୩୨ରେ ଭାରତ-ମିଆଁମାର ସୀମାନ୍ତବର୍ତୀ ଅଞ୍ଚଳରେ ୪.୫ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା ।
ଅନୁରୂପ ଭାବରେ ମଙ୍ଗଳବାର ଦିନ ୧.୪୭ ମିନିଟରେ ମିଆଁମାର-ଭାରତ ସୀମାନ୍ତରେ ୩.୭ ତୀବ୍ରତା, ଦିନ ୧୧.୫୮ ମିନିଟରେ ମହାରାଷ୍ଟ୍ରରେ ୩.୩ ତୀବ୍ରତାର ଭୂକମ୍ପ ଅନୁଭୂତ ହୋଇଥିବାବେଳେ ୨୨ ତାରିଖରେ ଓଡ଼ିଶାର ରାୟଗଡ଼ାରେ ଦିନ ୧୧.୦୯ ମିନିଟ୍ରେ ୩.୬ ତୀବ୍ରତାର ଭୂକମ୍ପ ହୋଇଥିବା ରେକର୍ଡ଼ କରାଯାଇଛି ।
ଗତ ପ୍ରାୟ ୧ ମାସ ମଧ୍ୟରେ ଦେଶର ବିଭିନ୍ନ ସ୍ଥାନରେ ପ୍ରାୟ ଶହେଥରରୁ ଅଧିକ ଭୂମିକମ୍ପ ଘଟିଥିବା ରେକର୍ଡ଼ କରାଯାଇଛି । ଏହାମଧ୍ୟରୁ ଅଧିକାଂଶ ଉତ୍ତରଭାରତ ଓ ଉତ୍ତର-ପୂର୍ବ ଭାରତରେ ଘଟିଥିବା ସୂଚନା ମିଳିଛି ।
