ଭୁବନେଶ୍ବର:ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧୀନରେ ଥିବା ସମସ୍ତ ଶିକ୍ଷାନୁଷ୍ଠାନରେ ପ୍ରଥମରୁ ଦ୍ବାଦଶ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ନକଲ(ଡୁପ୍ଲିକେଟ୍) କଲେଜ ଲିଭିଙ୍ଗ ସାର୍ଟିଫିକେଟ୍ ଓ ସ୍କୁଲ ଲିଭିଙ୍ଗ ସାର୍ଟିଫିକେଟ୍(ଏସ୍ଏଲ୍ସି) ମିଳିପାରିବ। କୌଣସି କାରଣ ଯୋଗୁଁ ଏହି ସାର୍ଟିଫିକେଟ୍ ହଜିବା କିମ୍ବା ନଷ୍ଟ ହେବା ଭଳି ସ୍ଥିତି ଉପୁଜିଲେ ସେ କ୍ଷେତ୍ରରେ ସଂପୃକ୍ତ ଶିକ୍ଷାନୁଷ୍ଠାନ ଉକ୍ତ ବିଦ୍ୟାର୍ଥୀଙ୍କୁ ସିଏଲ୍ସି ଓ ଏସ୍ଏଲ୍ସି ନକଲ ପ୍ରଦାନ କରିବେ। ବିଭାଗୀୟ ମନ୍ତ୍ରୀ ସମୀର ରଞ୍ଜନ ଦାଶଙ୍କ ନିର୍ଦେଶ ପରେ ବିଭାଗ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି। ଏହି ନିୟମ ପାଳନ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦେଶାଳୟର ନିର୍ଦେଶକଙ୍କ ଜରିଆରେ ସମସ୍ତ ଜିଲା ଶିକ୍ଷା ଅଧିକାରୀ(ଡିଇଓ)ଙ୍କୁ ନିର୍ଦେଶ ଦିଆଯାଇଛି।
ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ବିଭିନ୍ନ ସମୟରେ କୌଣସି କାରଣରୁ ସିଏଲ୍ସି ହଜିବା ଦ୍ବାରା ଛାତ୍ରଛାତ୍ରୀ ବହୁ ଅସୁବିଧା ଭୋଗ କରୁଥିବା ଦେଖିବାକୁ ମିଳିଥିଲା। ଏହାକୁ ଦୃଷ୍ଟିରେ ରଖି ବିଭାଗ ପକ୍ଷରୁ ଏଭଳି ପଦକ୍ଷେପ ନିଆଯାଇଛି। ଛାତ୍ରଛାତ୍ରୀ ସିଏଲ୍ସି ଓ ଏସ୍ଏଲ୍ସି ହଜିବାର ନିର୍ଦିଷ୍ଟ କାରଣ ଦର୍ଶାଇ ନକଲ ସାର୍ଟିଫିକେଟ୍ ନେଇପାରିବେ।
ତେବେ ଏଥିପାଇଁ ସଂପୃକ୍ତ ଶିକ୍ଷାନୁଷ୍ଠାନରେ ଆବେଦନକାରୀ ବିଦ୍ୟାର୍ଥୀ ସତ୍ୟପାଠ(ଆଫିଡେଭିଟ୍) ଦାଖଲ କରିବେ। ତେବେ କୌଣସି ବିଦ୍ୟାର୍ଥୀ ନକଲି ସାର୍ଟିଫିକେଟ୍ ନେଇ ଦୁଇଆଡେ ପଢିବା ଭଳି ଅପବ୍ୟବହାର କଲେ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅପବ୍ୟବହାର କରିଥିବା ବିଦ୍ୟାର୍ଥୀଙ୍କ ବିରୋଧରେ ଅପରାଧିକ ମାମଲା ସହ କଠୋର ଦଣ୍ଡବିଧାନ କରାଯିବ।
