ରେଙ୍ଗାଲିକ୍ୟାମ୍ପ: ସମାଜ ସେବାର ମହାନ ଉଦ୍ଦେଶ୍ୟ ନେଇ ଅତାବିରାରେ ଗଢି ଉଠିଥିବା ଆଶୀର୍ବାଦ ସେବା ସଂଗଠନ ଆଗେଇ ଚାଲିଛି ଲୋକଙ୍କ ସେବାରେ। ଆଗକୁ ଆସୁଛି ପଶ୍ଚିମ ଓଡ଼ିଶାର ମହାନ ଗଣ ପର୍ବ ନୂଆଖାଇ। ଏହି ପର୍ବରେ ସମସ୍ତେ ନୂଆ ଲୁଗା ପିନ୍ଧି ନୂଆ ଖାଇଥାନ୍ତି। ହେଲେ ଆର୍ଥିକ ଅନଟନ ଭିତରେ ରହି ଗରିବ ଶ୍ରେଣୀର ଶିଶୁମାନେ ସେହି ପର୍ବ ପର୍ବାଣୀକୁ ଉପଭୋଗ କରି ପାରି ନଥାନ୍ତି। ପ୍ରତିବର୍ଷ ସଂଗଠନ ପକ୍ଷରୁ ନୂଆଖାଇ ପୂର୍ବରୁ ଲୋକଙ୍କୁ ପୋଷାକ ବଣ୍ଟନ କରାଯାଇଥାଏ। ତେଣୁ ଚଳିତ ବର୍ଷ ମଧ୍ୟ ଗରୀବ ଶିଶୁମାନଙ୍କୁ ଏହି ଅନୁଷ୍ଠାନ ନୂତନ ପୋଷାକ ବଣ୍ଟନ କରିଛି। ସଂଗଠନର ସଭାପତି ତଥା ସମାଜସେବୀ କୃଷ୍ଣ ଚନ୍ଦ୍ର ପ୍ରଧାନଙ୍କ ତତ୍ତ୍ୱାବଧାନରେ ସମ୍ପାଦକ ଲେଶଦେବ ପ୍ରଧାନ, କୋଷାଧ୍ୟକ୍ଷ ଆଜିର ପ୍ରଧାନ, ସଭ୍ୟ ଦୁର୍ୟ୍ୟୋଧନ ଗଡତିଆ, ଦିଲୀପ ସାହୁ, ସାଧୁ ଗଡତିଆ, ଅଜିତ ପ୍ରଧାନ, ମନୋରଞ୍ଜନ ପ୍ରଧାନ, ସାମ୍ବାଦିକ ଆକାଶ ମିଶ୍ର, ଜନକରାମ ଦାଶ ପ୍ରମୁଖ ଉପାନ୍ତ ଅଞ୍ଚଳ ଯଥା ବେଳବାହାଲି, ଘନ ଘାଟି, ଖରମୁଣ୍ଡା ଆଦି ଗ୍ରାମମାନଙ୍କୁ ଯାଇ ସେଠାକାର ଗରିବ ଶିଶୁମାନଙ୍କୁ ପୋଷାକ ବାଣ୍ଟିଥିଲେ। ନୂଆଖାଇ ପାଇଁ ନୂତନ ପୋଷାକ ପାଇ ପିଲାମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଥିଲା। ସଂଗଠନର ଏତାଦୃଶ କାମକୁ ଅଞ୍ଚଳରେ ସାଧୁବାଦ ଦିଆଯାଇଛି।
Comments are closed.