ସମାଜ ଡିଜିଟାଲ ଡେସ୍କ: ଆମେରିକା ପୁଣି ଥରେ ପରମାଣୁ ଅସ୍ତ୍ର ପରୀକ୍ଷଣ କରିବ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରତିରକ୍ଷା ମନ୍ତ୍ରଣାଳୟ(ପେଣ୍ଟାଗନ)କୁ ପରମାଣୁ ଅସ୍ତ୍ର ପରୀକ୍ଷଣ କରିବାକୁ ନିର୍ଦେଶ ଦେଇଛନ୍ତି । ସେ ରୁଷ ଏବଂ ଚୀନ ସ୍ତରକୁ ପହଞ୍ଚିବା ପାଇଁ ପରୀକ୍ଷଣ କରିବାକୁ କହିଛନ୍ତି । ଆଜି ଚୀନ ରାଷ୍ଟ୍ରପତିଙ୍କ ସହ ସାକ୍ଷାତ କରିବା ପରେ, ଟ୍ରମ୍ପ ପରମାଣୁ ପରୀକ୍ଷଣ ନିର୍ଦ୍ଦେଶକୁ ଯଥାର୍ଥ ଦର୍ଶାଇ ଏକ ବିବୃତ୍ତି ଜାରି କରିଛନ୍ତି । ଏହି ସମୟରେ ଟ୍ରମ୍ପଙ୍କ ନିର୍ଦେଶ ପରେ ପ୍ରକାଶିତ ଏକ ରିପୋର୍ଟ ଅନୁସାରେ ଆଗାମୀ ୨୪ରୁ ୩୬ମାସ ମଧ୍ୟରେ ପରମାଣୁ ପରୀକ୍ଷଣ କରାଯିବ ।
ଟ୍ରମ୍ପ କହିଛନ୍ତି ଯେ ଯଦି ରୁଷ ଏବଂ ଚୀପ ପରମାଣୁ ପରୀକ୍ଷଣ କରିପାରିବେ, ତେବେ ଆମେରିକା କାହିଁକି ସମାନ କରିପାରିବ ନାହିଁ । ଆମେରିକା ବିଶ୍ୱରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ରଶସ୍ତ୍ର ରଖିଛି, ତଥାପି ଆମେ ପରୀକ୍ଷଣ କରିବୁ କାରଣ ଅନ୍ୟ ଦେଶମାନେ ମଧ୍ୟ ପରୀକ୍ଷଣ କରନ୍ତି । ଆମେ କେବେ ଏବଂ କେଉଁଠାରେ ପରମାଣୁ ପରୀକ୍ଷଣ କରିବୁ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ, କିନ୍ତୁ ଆମେ ଶୀଘ୍ର ସ୍ଥାନ ଏବଂ ସମୟ ଚୂଡାନ୍ତ କରି ପରୀକ୍ଷଣ ପାଇଁ ଘୋଷଣା କରିବୁ ।
