ବାଙ୍କୀ : ବାଙ୍କୀ-ଡମପଡା ପଞ୍ଚାୟତ ସମିତି ସମ୍ମିଳନୀ ପ୍ରକୋଷ୍ଠରେ ବ୍ଲକରେ କାର୍ଯ୍ୟକାରୀ ହେଉଥିବା ବିଭିନ୍ନ ଜନକଲ୍ୟାଣ କାର୍ଯ୍ୟକ୍ରମର ସମୀକ୍ଷା କରାଯାଇଛି। ଶୁକ୍ରବାର ଦିନ ବ୍ଲକ ଅଧ୍ୟକ୍ଷ ପ୍ରଣବ କିଶୋର ପଟ୍ଟେଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ସମୀକ୍ଷା ବୈଠକରେ ମୁଖ୍ୟ ଅତିଥି ଭାବରେ ବିଧାୟକ ଦେବୀରଞ୍ଜନ ତ୍ରିପାଠୀ ଯୋଗଦେଇ ବିଭିନ୍ନ ଜନକଲ୍ୟାଣ ଯୋଜନାର କାର୍ଯ୍ୟକାରିତା, ଲୋକଙ୍କ ପାଖରେ ପହଞ୍ଚୁ ଥିବା କାର୍ଯ୍ୟଟି କେତେଦୂର ରୂପାୟନ ହୋଇଛି ତାହାର ପ୍ରତିଟି ଦିଗ ଉପରେ ଅନୁଧ୍ୟାନ କରି ବିଭାଗୀୟ ଅଧିକାରୀ ମାନଙ୍କ ସହ ବିଧିବଦ୍ଧ ଆଲୋଚନା କରିଛନ୍ତି । ଏହି ବୈଠକରେ ବାର୍ଦ୍ଧକ୍ୟ, ବିଧବା ଭତ୍ତା, ହରିଶ୍ଚନ୍ଦ୍ର ଯୋଜନାରେ ସହାୟତା, ଖାଦ୍ୟ ସୁରକ୍ଷା କାର୍ଯ୍ୟକ୍ରମ ଏବଂ ମନରେଗା ଯୋଜନାର କାର୍ଯ୍ୟକାରୀତା ସ୍ଥିତି ସମ୍ପର୍କରେ ଆଲୋଚନା କରିଛନ୍ତି । ବିଡିଓ ଶ୍ୟାମଳ କୁମାର ରାୟ, ଜିଲ୍ଲାପରିଷଦ ସଦସ୍ୟ ଆଶିଷ ସାହୁ, ସହକାରୀ କାର୍ଯ୍ୟ ନିର୍ବାହୀ ଯନ୍ତ୍ରୀ ସ୍ମୃତିମୟୀ ଜେନା, ବିତ୍ତିୟ ଅଧିକାରୀ ତାରିଣୀ ପ୍ରସାଦ ବିଶ୍ୱାଳ, ଗ୍ରାମପଞ୍ଚାୟତ ଅଧିକାରୀ ତ୍ରିନାଥ ଜେନା ପ୍ରମୁଖ ଯୋଗଦେଇ ସମୀକ୍ଷାରେ ସହଯୋଗ କରିଥିଲେ। ଯେଉଁ ବିଭାଗର ସେବା ଲୋକଙ୍କ ପାଖରେ ଅପହଞ୍ଚ ଅଛି କିମ୍ବା କୌଣସି ସେବା ନପାଇବା ନେଇ ଜନସାଧାରଣଙ୍କ ଠାରୁ ଅଭିଯୋଗ ପ୍ରଶାସନ ନିକଟରେ ପଡିରହିଛି ଏ ସମସ୍ତ ଦିଗକୁ ତୁରନ୍ତ ଓ ତ୍ୱାରିତ ସେବା ଯୋଗାଇବା ପାଇଁ ବିଭାଗୀୟ ଅଧିକାରୀଙ୍କୁ ବୈଠକରେ ବିଧାୟକ ଶ୍ରୀ ତ୍ରିପାଠୀ ନିର୍ଦ୍ଦେଶ ଦେଇଛନ୍ତି। ସୂଚନା ଯୋଗ୍ୟ ଯେ ପଞ୍ଚାୟତ ସମିତି ଗଠନ ହେବା ପରେ ବିଧାୟକଙ୍କ ଦ୍ୱାରା ଏହା ପ୍ରଥମ ସମୀକ୍ଷା ବୈଠକ ବୋଲି ବିଡିଓ ସୂଚନା ପ୍ରଦାନ କରି ଡମପଡା ବ୍ଲକରେ ଲୋକ ମାନଙ୍କ ପାଇଁ ପ୍ରଦାନ କରାଯାଉଥିବା ସେବା ଗୁଡିକ ପାଇଁ ଅଧିକାରୀ ମାନେ ସହଯୋଗ କରିବାଲାଗି ଆହ୍ୱାନ ଦେଇଛନ୍ତି।
Comments are closed.