ଚଣ୍ଡୀଗଡ଼: ହରିୟାଣାରେ ବିଧାନସଭା ନିର୍ବାଚନ ପାଇଁ ସୋମବାର ଭୋଟଗ୍ରହଣ ହେବାକୁ ଥିବାବେଳେ ଏହା ପୂର୍ବରୁ ବିଜେପିର ଜଣେ ପ୍ରାର୍ଥୀଙ୍କ ମନ୍ତବ୍ୟକୁ ନେଇ ବିବାଦ ସୃଷ୍ଟି ହୋଇଛି। ରାଜ୍ୟର ଅସାନ୍ଧ ଆସନରୁ ପ୍ରାର୍ଥୀ ହୋଇଥିବା ବିଜେପି ନେତା ବଖଶୀଶ ସିଂହ ୱିର୍କଙ୍କ ଏକ ଭିଡିଓ ଭାଇରାଲ ହୋଇଛି। ୱିର୍କ ଲୋକଙ୍କୁ ଧମକପୂର୍ଣ୍ଣ ଚେତାବନୀ ଦେବା ସହିତ ଇଭିଏମରେ ଯେକୌଣସି ସୁଇଚ୍ ଟିପିଲେ ଭୋଟ ପଦ୍ମ ଫୁଲକୁ ଯିବ ବୋଲି କହୁଥିବା ଭିଡିଓରେ ଦେଖିବାକୁ ମିଳିଛି। ଏହି ଭିଡିଓ ବହୁମାତ୍ରାରେ ଭାଇରାଲ ହେବାରେ ଲାଗିଛି। ଅସାନ୍ଧ ବିଧାନସଭା କ୍ଷେତ୍ରରେ ଏକ ସଭାରେ ସେ ଏଭଳି କହିଥିବା ଜଣାପଡ଼ିଛି।
ବଖଶୀଶ ସଭାରେ କହିଛନ୍ତି, ଆଜି ଯଦି ଆପଣମାନେ ଭୁଲ କରୁଛନ୍ତି, ତେବେ ୫ବର୍ଷ ଧରି ଭୋଗିବେ। କିଏ କାହାକୁ ଭୋଟ ଦେଉଛ ତାହା ବି ମୋତେ ଜଣାପଡ଼ିଯିବ। ଯଦି ଚାହିଁବ କହି ବି ଦେବି। ମୋଦୀ ଏବଂ ମନୋହର ଲାଲଙ୍କ ନଜର ବହୁ ଦ୍ରୁତ। ଆପଣମାନେ ଇଭିଏମରେ ଯେଉଁ ବଟନ ଚିପିଲେ ବି ଭୋଟ ବିଜେପିକୁ ଯିବ। ଆମେ ମେଶିନଗୁଡ଼ିକରେ ସେହିଭଳି ସେଟିଂ କରିଛୁ। ବିଜେପି ନେତାଙ୍କ ଏପରି ମନ୍ତବ୍ୟକୁ ନେଇ ବିଭିନ୍ନ ରାଜନୈତିକ ଦଳ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହିତ ଇଭିଏମ ଟ୍ୟାମ୍ପରିଂ ନେଇ ଅଭିଯୋଗ ମଧ୍ୟ କରାଯାଇଛି।
ତେବେ ଭିଡିଓ ସମ୍ପର୍କରେ ବଖଶୀଶ କହିଛନ୍ତି, ତାଙ୍କ ମନ୍ତବ୍ୟକୁ ତ୍ରୁଟିପୂର୍ଣ୍ଣ ଭାବେ ଦର୍ଶାଯାଇଛି। ଭିଡିଓକୁ ଏଡିଟ୍ କରାଯାଇଥିବା ସେ ଅଭିଯୋଗ କରିଛନ୍ତି।
